神級鬥 木村老竇硬撼神醫堺雅人

前年神劇《半澤直樹》大結局高收42.2%,令男主角堺雅人取代木村拓哉成為新收視之神。嚟到2015春季日劇,兩位收視之神終於遇上。木村喺新劇《I’m Home》當中首次飾演爸爸,再搵埋「半澤嫂」上戶彩做女主角,硬撼堺雅人《Dr.倫太郎》天才精神科醫生。兩劇雖然唔係同時段播出,但都叫同期上檔,到底邊個先係真正的王者?好快有答案。

text-Phoebe

堺雅人片酬創新高
《半澤直樹》創下42.2%高收視,無論係電視台定劇迷都熱切期待續集嘅出現,奈何,堺雅人完全無意再做「半澤」,一心準備夏季大河劇《真田丸》嘅拍攝,但突然殺出《Dr.倫太郎》,起初都令人幾費解。
不過,當電視台NTV公布《Dr.》幕後班底有去年日劇收視冠軍《Doctor-X 3》嘅編劇中園美保時,謎底即時解開,因為擅長寫醫療劇嘅佢原來係堺雅人粉絲,於是主動邀請對方出演。不過,個人認為誠意係前菜,片酬先係主菜,因為堺雅人今次片酬高達400萬日圓1集(日本頂級演員片酬約250-300萬左右;《半澤》時,堺雅人收200萬),請問有唔拍嘅理由嗎?

木村拍檔夠弔詭
《I’m Home》改編自石坂啓喺97年面世嘅同名漫畫。故事講述男主角喺火場死裏逃生後失憶,對於過去5年發生嘅事完全冇印象,連現任老婆同個仔都唔認得,剩係記得前妻同大女,為填補呢5年真空期,於是走訪各個地方解開謎團。為保萬人迷形象,所以42歲嘅木村多年嚟喺劇中都堅持單身,就連現實中,都甚少提到老婆工藤靜香同兩個女,今次破禁喺新劇做老竇,到底係向現實低頭,定想轉走演技派路線?
《I’m Home》除咗有木村之外,電視台重搵嚟半澤直樹嘅老婆上戶彩同老友及川光博出演,單係呢個倒戈組合,已經夠正。

劇迷得着
春季日劇除咗木村對決堺雅人之外,另外幾部其實排場都唔弱,當中佐藤健嘅《天皇的御廚》,更被劇迷睇高一線。

YOU MAY ALSO LIKE ...