《男排女將》陳卓賢鄧麗欣曾是港隊排球代表！盤點運動員出身的靚仔靚女藝人

鄧麗欣排球女神

《男排女將》之所以有收視又有口碑，好演技仲好好波嘅鄧麗欣可謂功勞最大，皆因Stephy真係識打排球，仲要由細打到大，中學時代更加係港隊青年軍，早兩年亦都自己搞過球隊㖭！

方力申游泳健將

爸爸爺爺都係游泳健將，方力申因此亦從小習泳，不過方家最高成就肯定係 Alex，15歲開始代表香港隊出賽，曾經擁有九項香港紀錄，至今200米背泳同400米個人混合泳紀錄都未有人破到。

陳卓賢香港男子排球代表隊

香港男子組合MIRROR成員之一嘅陳卓賢，曾經係香港男子排球代表隊隊員，以及南華排球隊隊員，18年因為參加《全民造星》奪得亞軍，決心專注發展演藝事業而退出排球港隊，不過入行第一套劇《男排女將》都係做排球員。

何雁詩高爾夫球港隊成員

細細個就開始玩高爾夫球，因為喜愛又有天份被爸爸重點培訓，何雁詩曾經係高爾夫球港隊成員代表香港出戰亞運，18年復出參加業餘賽亦奪得女子組冠軍。

余德丞泳隊成員代表香港出賽

名校華仁出身嘅余德丞中學年代已經係泳隊成員，由代表學校出賽到加入港隊代表香港出賽，可惜一直未能圓夢達到亞運要求出戰亞運。

陳健安花式足球香港冠軍

組合C All Star成員安仔陳健安 14歲加入香港青年軍足球隊，21歲踢過兩年甲足，除此之外安仔亦係狂熱花式足球愛好者，攞過香港冠軍，又同朋友自組花式足球隊推動花式足球運動。

陳展鵬曾加入乒乓港隊

原來視帝陳展鵬自細愛打乒乓球，13歲被發掘喺銀禧體育學院接受訓練，之後加入香港青年隊再加入港隊，係人人都識嘅乒乓孖寶師兄嚟㗎！

梁漢文足球愛好者

踢足咁多年明星足球隊，其實梁漢文唔止當足球係愛好，自小因為足球員舅父尹志強關係接觸足球接受訓練，13歲已經做教練教小學生踢波，16歲仲曾經加入港隊青年軍㖭！

歐鎧淳飛魚女神

同性密友係籃球員，前度又係棒球運動員，大家都好熟悉嘅飛魚女神歐鎧淳自己就係游水出身，現為12項香港紀錄保持者，戰績彪炳，還多次為香港出戰奧運。

胡子彤香港棒球隊隊員

拍攝棒球主題電影《 點五步 》入行，胡子彤正正本來就係香港棒球隊隊員，才被睇中做電影男主角。自細出身棒球世家，加入港隊前，胡子彤15歲開始已在球會兼任棒球教練。

李思雅職業網球運動員

主持過十年《體育世界 》嘅李思雅出身於運動世家，媽媽曾係香港保齡球代表，父親及胞姐都熱愛網球，自己14歲已經奪得網球賽錦標，係本地職業網球運動員。