偷食, 王浩信, 陳浩民, 許志安, 倪震

盤點偷食男星兼背後大器女人 王浩信套套劇做緋聞、張致恆腳踏五船!

流行娛樂

廣告

有謂「男人不壞,女人不愛」,此言非虛,好似近日前商台DJ細So偷食人妻,醜聞愈挖愈臭,佢老婆唔單止冇離開佢,仲選擇原諒佢㖭!唔止細So好彩有個大方老婆,其實圈中仲有一班曾經行差踏錯、自稱壞咗嘅男星,無論做到幾錯,最終都能夠獲得老婆大人原諒,希望佢哋真係知錯能改,回頭是岸!

撰文、圖片:東方新地丨原文刊於:東方新地丨編輯:白子

 

盤點偷食男星兼背後大器女人

許志安、Sammi:成功修理「壞咗嘅老公」

去年四月,的士監視器片段流出,人夫許志安被影到在的士上被當時馬國明女友黃心穎又擒又啜,疑似齊齊返黃心穎鯉魚門香閨,一夜之間偷食男女事業宣告玩完,亦連累雙方另一半。鄭秀文翌日在社交平台發長文回應事件:「婚姻當中除了彼此給予的幸福溫暖,當中也深深包含了彼此的錯誤和彼此的原諒。」Sammi最終選擇原諒了安仔!

林文龍、郭可盈:神秘錄音爆林文龍搭上內地女星

林文龍與郭可盈拍拖九年、結婚十六年,無論婚前定婚後傳出緋聞,郭可盈態度都係企喺老公一邊支持到底。 最經典一役係09年流出神秘錄音,電話中出現疑似林文龍、疑似郭可盈和疑似可盈內地經理人汪子琦的聲音,疑似文龍更在對話中承認搭上25歲內地女星董維嘉。事後兩公婆齊齊手拖手開記招,可盈不提婚變傳聞,只表示已正式就聲帶向內地及香港警方備案。

彭順、李心潔:彭順偷嗒𡃁模李悅彤

02年拍完經典鬼片《 見鬼 》,導演之一嘅彭順撻著當年紅到一個點嘅李心潔,10年二人成婚,李心潔仲幫手湊埋彭順與前妻所生嘅9歲女兒,卻換來14年彭順偷嗒𡃁模李悅彤,更斷正被影到在圓方邊啜邊行街睇戲。事後兩夫妻共同發表聲明,表示會共同面對對錯、痛苦、過去與未來。其後彭順修心養性,李心潔則於16年為彭順誕下孖仔。

陳浩民、馬德鐘:借醉擒啜摷年僅十九歲嘅新人

11年11月,陳嘉桓在橫店拍攝王晶電影《 笑功震武林 》期間,與同劇演員到燒烤店食串燒。同場陳浩民、馬德鐘借醉又攬又錫又摷胸全程被本刊捕捉無遺,事後馬德鐘否認輕薄後輩獲初戀女友兼妻子張筱蘭繼續支持,陳浩民則帶埋大肚太太蔣麗莎開記招公開道歉。九年過去,兩對夫妻持續放閃,完全無視當年軼事。

倪震、周慧敏:分手後閃電復合兼結婚

愛情長跑分分合合,與玉女掌門人周慧敏相戀將近二十年,倪震於08年喺蘭桂坊夜蒲「 孔雀開屏 」濕吻21歲城大女生張茆,二人感情真正遇上考驗。事後倪震引咎分手,周慧敏卻發聲明,指只有佢一個人有資格去定論倪震嘅對錯,之後事件峰迴路轉,分手後閃電復合,更召埋律師上門在家中正式行禮結為夫妻。

王浩信、陳自瑤:老婆大肚老公帶𡃁模上樓

陪在王浩信身邊從二、三線大茄捱到做男主角甚至上位做埋視帝,老婆陳自瑤換來嘅係老公套套劇傳緋聞,江嘉敏、黃心穎、蔡思貝、莊思明以外,時間點最離譜最斷正一次,係11年二人奉女成婚、YoYo 大住肚、11月行婚禮前夕,男方被發現多次帶𡃁模 Cammi(謝芷蕙)上樓。事後婚禮照舉行,陳自瑤表示嬲、不過罪過在於女方過分主動,選擇原諒王浩信。

張致恆:與粉絲奉子成婚、正印梁皓恩被分手

偷食成癮緋聞厚過電話簿嘅張致恆去年中失驚無神宣布雙喜臨門,表示將迎娶粉絲雯雯,並公開囝囝百日宴照片。不過隨即爆出正印梁皓恩(April)被分手,亦愈爆愈多疑似同時至少腳踏五船。不過雖然演藝事業玩完、對外誠信破產、養妻活兒經濟能力亦成疑,太太雯雯依然愛得堅定,今年六月更火速生埋第二胎。

YOU MAY ALSO LIKE ...