方東昇 孝順又愛妻 一級榮譽畢業生 老婆係初戀女友

流行娛樂

廣告

大台節目近年甚少佳作,無論劇集定綜藝節目,啲反應都係麻麻地,睇嚟明星效應唔太掂。不過估唔到由新聞主播 方東昇 做主持嘅《世界零距離》竟然爆出!結果再拍續集《世界零距離II》和《世界零距離III》。方東昇喺節目中大玩食字gag,手法輕鬆兼幽默,吸引大批觀眾支持。唔講唔知,原來依位「爛gag」主持,大有來頭,係一級榮譽畢業生,亦係一位好老公。

撰文:Jacqueline 圖片:新傳媒圖片庫

日前播出的《世界零距離III》,繼續由文質彬彬嘅方東昇去做主持,每集都有唔少精妙金句爆出,難怪一班觀眾咁支持。就好似啱啱播出嘅第二集,方東昇又再次「金句王」上身,大爆金句。

喺介紹埃塞俄比亞嘅交通時,就爆出一句「搭車難,塞車煩」。

當講到埃塞俄比亞嘅時間觀念同其他國家與別不同,係採用比西曆慢7年8個月嘅古羅馬儒略曆,即是一年有13個月,一天採用12小時制嘅時候,又一臉感慨地爆出金句:「人未必識得珍惜青春,但往往介意年齡」。

「中大才子」 一級榮譽畢業

方東昇喺節目入面,句句金句都為人津津樂道,大受觀眾同網民歡迎。唔講唔知,依位「爛gag」主持,原來大有來頭,除咗係一級榮譽畢業生之外,仲係一位好老公。方東昇有「中大才子」之稱,98年加入無線新聞部,99年畢業於香港中文大學新亞書院新聞及傳播學系,並以一級榮譽畢業,更獲得新亞書院獎學金最高榮譽誠明獎。為人不但風趣幽默,而且又有內涵,咁好條件去邊搵!

初戀女友變老婆

不過,原來,佢喺2006年已經「抱得美人歸」,另一半係舊同學主播吳先瑩嘅細妹吳先玲,更係方東昇嘅初戀。方東昇26歲才開始初戀,連身邊嘅朋友都難以相信,一個條件咁好嘅人,之前竟然從未拍過拖,甚至因為咁,曾經一度懷疑方東昇「有問題」。當時吳先瑩結婚,身為同學兼同事嘅方東昇,就為佢嘅婚禮擔任大會司儀,結果就遇上為姐姐做伴娘嘅吳先玲。方東昇對吳先玲一見傾心,展開猛烈的追求攻勢。例如參加女方的教會聚會,爭取見面機會。最後成功「抱得美人歸」,亦成為了基督徒。

岳母想要方東昇做女婿 願望成真

作為「才子」嘅方東昇,原來另一半亦非常厲害,外表斯文嘅吳先玲係一位運動健將,小六時已成為香港乒乓球代表隊,又曾經喺國際賽上擊敗日本隊,為港爭光。後來更一度想成為職業運動員。不過因順從爸爸的意願,所以喺中文大學英文系畢業後,就成為了中學老師,任教英文。而喺佢同方東昇未認識之前,有日吳媽媽喺電視上睇到方東昇報道新聞之後,大讚:「這小伙子真不錯,我有這樣的女婿就好了!」結果吳媽媽的願望竟能成真撞正口卦,相信佢一定好鐘意依個女婿。

方媽媽係才女 徵文比賽奪冠

方東昇除咗對老婆好,仲係一名孝順仔。由於做主播,收入都算穩定,方東昇喺2000年就決定同媽媽聯名買樓,以268萬買入青衣海欣花園一個單位,婚後仍與母親一齊住。有個「才子」囝囝,方媽媽一定好安慰。不過原來方媽媽都係一名「才女」,同囝囝一樣文筆極好,仲曾經喺公開徵文比賽中贏得冠軍,果然係「有其母必有其子」。

方東昇係兩婆媳「共同敵人」

雖然方東昇經常都要周圍飛,做採訪工作。但老婆同媽媽相處非常融洽,冇乜拗撬,令佢非常放心。方媽媽喺一篇名為「方老太寫給方太的信」中透露,兩婆媳有共同興趣,鐘意一齊捉棋打乒乓波,亦有共同敵人——方東昇。方媽媽話方東昇經常掛住工作,唔肯休息,所以兩婆媳就會夾計迫佢唞,好有默契!「才子」方東昇有個好老婆之餘,又有個咁叻咁有才華嘅媽媽,真係令人羨慕,最緊要係一家人可以相處融洽,無婆媳糾紛,真係好幸福!

關鍵詞
方東昇