嘩鬼上學去web

愛妻號陸永日日報告? 《嘩鬼上學去之 農夫 篇》花絮獨家爆料

流行娛樂

廣告

睇咗幾集都知, 農夫 兩子陸永同C君即使無咗DoDo姐都一樣咁好笑,英國留學即使慘被地獄式體育訓練都示範到「嘴失禁」,真係要畀啲掌聲!不過幕前好好笑,幕後停機時會唔會係只齋玩手機?定依然無時停不停亂噏當秘笈?出名係愛妻號的陸永又有無日日越洋報告?或者變做甩繩馬騮放監唔理愛妻愛女?今次幫大家追問監製獨家爆料,即睇!

資料來源:新假期

01 |體育挑機 C君慘變趴街

今次去的Mount Kelly College是英國出名的運動名校,農夫去到第一時間當然要同學生作身體交流,出馬前兩條友仔勁得戚:「我地兩個牛高馬大,佢哋成班中學雞,點會輸喎?」可惜事與願違!陸永挑戰傳統運動板球,以為手長腳長一定接到波,點知快到連波尾都見唔到,嚇到佢以為對方練成「童夢幻影球」;C君話自己下盤結實,走去玩Rugby,可惜Tackle練習目標時已慘變趴街,真係陰公豬!在場監製都睇唔過眼,「哇!你兩個玩一陣已經瘦咗一圈喎」,諗住完?你就想!之後仲要游水划艇玩帆船,兩個人慘被地獄式訓練,陸永最後忍唔住:「嚟留學,麻煩操弗個Body先!」

02 |泥漿步行 老漢推車鬼食泥

英國特種兵傳統訓練要跑泥漿(Tough Mudder),學校竟然有類似體驗,一場去到農夫自然再「中伏」,換上尷尬緊身衣後即跟大隊上場,陸永行兩步已心知不秒,話好似有10個羅莽師傅捉實你;C君更再次趴街,教練出動都要成5分鐘先成功解救,同學仔話原來早前落過雨,泥漿軟化勁難行!之後仲要玩「泥上老漢推車」,陸永醒目即舉手話要做「老漢」,C君扮車時慘叫,「玩野咩!我咁重手又短,行果陣啲泥高過我個鼻,今舖真係鬼食泥呀!」最後仲大鑊,竟然係跳崖,監製見到時層樓高既山崖已叫停,點知兩個人心口有個勇字竟然一躍而下,事後邊手震邊話:「我哋香港過嚟,唔可以衰俾外國小朋友睇!」監製,麻煩頒個獎俾佢哋!掌聲!

03 |軍服野戰 血腥求生嚇到面青青

陸永最欣賞外國教育課程,在於佢哋唔止學書本上的知識,而係會教求生技能,好似野外定向堂就係一個例子!當日晨咁早天未光就著好軍服集合,同學仔個個都有板有眼,陸永話自己似「劉大衛」,C君更話自己係天生軍人,因為佢本名係「鄭斯君……人」喎,不過我睇極都覺得佢兩個只係似兵仔囉!在勁陰森又方原百里無人的草原行成幾個鐘就終於見到目的地,教練竟然即刻教大家「處理」野兔,畫面血腥睇到佢哋兩個差啲反白眼,但在場其他同學非常氣定神閒,事後問返先知,「野兔在當時情況只係食物,無得驚!」由細開始接受訓練,果然寧舍不同,有膽識!

04 |矇眼畫畫 鬥氣玩決裂

Mount Kelly College注意多元發展,上堂出名有創意,估唔到美術堂都有新花臣,竟然係矇眼畫畫鍛練團隊精神。陸永C君話晒都組團農夫超過15年,當然未驚過,C君矇眼後陸永即刻開始,可惜搞笑癮發作,當然亂噏當秘笈,「哇!你畫得好好呀!隻貓畫到好似狗咁;隔離仲有個花樽,點解你畫到寶礦力咁?」真係畫到C君扯埋火,連老師都出馬叫佢正經啲!最後?兩幅畫當然都一塌胡塗,老師評價F級,毫無合作精神!唔通佢哋不和爭Do姐寵係真既?

05 | 收買人心 宿舍玩國粹輸俾同學仔

去留學,同學仔最怕宿舍新朋友難相處,農夫在節目中懶醒俾貼士,就話一定要作深文化交流,搞爛Gag教廣東話已屬低手表現,識玩一定係玩國粹打麻雀,「麻雀邊打邊吹水,打賭贏咗叫可以叫佢做你手下,好化算」,點知外國朋友仔鬼咁醒目一點就明,即使農夫集精匯神,陸永仲心思思想出古惑,可惜都係一句「食糊」慘被KO,不過氣氛超融洽,監製都讚農夫搭訕係有一手,值得學習!

終極劇透:DO姐現身!

「想賣甩Do姐?無咁易」,Do姐竟然現身畢業典禮,嚇死佢哋!農夫當然受寵若驚,陸永仲話「我要一世侍奉Do姐」!期間Do姐仲做咗個驚喜Event,可惜監製話要賣個關子,想睇佢哋3個再鬥氣,唯有較鬧鐘準時睇節目吧!

《嘩鬼上學去之農夫篇》
日期:2016年9月19日至23日晚上10時30分(共5集)
頻道:翡翠台
內容延讀:
《嘩鬼上學去之 農夫 篇》劇透!5大必睇搞笑位!
>>> LIKE我們fb <<<
www.facebook.com/newmonday.com.hk

YOU MAY ALSO LIKE ...