周國賢

周國賢18年來首登紅館騷 粉絲開po怒插港人睇騷文化

流行娛樂

廣告

周國賢Endy一連三場的《Endy Chow Jaugwokyin The End Live in HK Coliseum 2022》演唱會,前晚(2日)正式開鑼,香港演唱會一向有幾大「特別文化」,如全場大合唱、跟住打拍子和輪迴encore等等,有粉絲欣賞完周國賢演唱會後在討論區出post,狠批香港人欣賞演唱會的「文化」好X差,覺得香港演唱會文化真係好神奇,此帖引發網民熱討。

周國賢出道18年首登紅館騷

周國賢月前興奮宣布終於可以登上紅館舞台,更在直播期間不慎自爆唔少細節,正式開騷前,他坦言開過很多次會,特別著重舞台安全,所以專注在音響及主題概念上,唔會有太多花巧嘢,而本來舞台有唔少華麗的設計都以另一方式呈現,不過反而令他更安心,因為他自嘲畏高、冇方向感同隻眼細到睇唔到嘢,所以舞台上的改動令他更安心。他首踏紅館舞台開個人騷,欷歔表示自己花了18年時間,終於有屬於自己的紅館騷他他,指有些人可以一、兩年就踏上紅館舞台,但唔明自己為何要花上18年時間先可以,興奮到整個人瞓在紅館舞台上享受一番。

周國賢 舞台設計簡單,靠周國賢落力自彈自唱,亦帶出hyper氣氛。
舞台設計簡單,靠周國賢落力自彈自唱,亦帶出hyper氣氛。(圖片來源:周國賢@fb)
周國賢 出道近廿年,先可以首嚐紅館開個唱滋味。
出道近廿年,先可以首嚐紅館開個唱滋味。(圖片來源:周國賢@fb)

睇完周國賢 粉絲怒插西粉

周國賢演唱會未完,但有粉絲睇完後火都嚟,在討論區以題為「香港人睇演唱會文化真係好L差」開po插爆西粉,稱「睇完周國賢,覺得香港演唱會文化真係好神奇」,他好有心例舉了他心目中的四大西粉絲,分別有「尖叫L」、「錯拍L」、「開燈L」和「嗌encore文化」。

周國賢 網民睇完周國賢演唱會好有感慨吓!
網民睇完周國賢演唱會好有感慨吓!(圖片來源:連登討論區截圖)

周國賢淚眼談故人 「尖叫L」超礙事

「尖叫L」相信睇騷時總有隻喺附近,樓主就話:「其實咁多年都重未叫完咩?個啲叫嫁比我呀係咪覺得自己好風趣?頭先個場直接叫到聽唔到周國賢講咩,佢講個fd走咗之前重有人叫」話說周國賢在演唱會上,感觸提到在舉行演唱會前一周,與他共事七年的同事離世,他謂:「佢係我司機,我有咩需要,她都會好細心,就好似我家姐一樣,我同呢個地方(紅館)一而再再而三地擦身而過,直至今日終於可以喺呢度,但佢行早咗少少,我記得幾個月前,收到開呢個演唱會嘅消息,佢同我講:『終於可以載我上紅館』佢做到喇,多謝家姐,我們會再見!」講緊咁嚴肅帶悲傷的話題,旁邊觀眾有理無理尖叫又的確幾擾人的。

「錯拍L」拍子錯晒跟住唱

經典的「錯拍L」當然唔少得,樓主寫道:「其實人地live有live編曲,你係都要拍1234做乜姐,人地要拍子就有鼓佬啦,重要拍錯晒!」怨氣頗深吓,當你睇緊騷,想聽吓粒星唱歌,隔籬跟住唱仲要錯晒,都真係幾躁吓!

「開燈L」係咪都開手機電筒亂咁照

第三種是「開燈L」,樓主道:「其實人地係有舞台設計,點解首首歌都要開led燈白到都咩特色都睇唔到,頭先首《我們都不是無辜的》都要開燈fing,無晒feel」樓主講求燈光諧和,但唔少網民都話,最怕睇睇吓騷俾強光照射到,因為唔少人會開著手機電筒燈fing嚟fing去,自以為增加氣氛但又唔覺意影響到人。

周國賢 樓主對周國賢演唱會上,唱moody歌配合燈光,但唔少觀眾欵似開了手機的電筒燈而不滿。
樓主對周國賢演唱會上,唱moody歌配合燈光,但唔少觀眾欵似開了手機的電筒燈而不滿。(圖片來源:[email protected]截圖)

Encore都係錯?

最後樓主提到「encore文化」,似乎是替周國賢辛苦而申訴喇:「佢準備左咁多就係咁多,死都要叫encore,你聽多首會賺左?」文末搭多句:「呢啲人重(從)來只係會自high,覺得自己enjoy完就算」樓文post一出吸到過千likes,但亦有500多unlikes,撐他的網民謂:「仲有啲拍片X,你用隻眼睇演唱會定用鏡頭睇?」、「1、2、3都讚(贊)同,但4有啲特別,好多歌手encore係主辦單位一早plan好,開場前佢哋已經知有幾多首歌要enocre,會over run幾耐」、「尖叫唔係唔得,但唔識睇時機,係唔係都叫,開燈仲onX,人哋個mood就係用暖色系,你射個白光出去真係xxxx」、「我俾錢聽歌手唱歌唔係聽你哋唱㗎!」、「要唱k去neway啦仆X」等等。

周國賢 唔知周國賢知道觀眾睇後感,熱烈討論他演唱會文化會有咩感受呢?
唔知周國賢知道觀眾睇後感,熱烈討論他演唱會文化會有咩感受呢?(圖片來源:周國賢@fb)

反對者頂癮金句

有正當然亦有反面,雖然樓主的post獲千人力撐有理,但亦有唔少網民認為在香港睇演唱會都係好著重氣氛的,覺得樓主太吹毛求疵不如去睇胡楓演唱會,頂癮留言有:「係咪要考埋證書先有資格睇演唱會」、「去睇胡楓演唱會就冇晒呢啲問題,利申:已購入$980門票」、「香港人究竟有幾X辛苦,睇個演唱會放鬆吓都要俾人批鬥,係咪細個讀緊書好鍾意舉手話人哋傾偈嗰啲學生嚟!」等等。

周國賢
(圖片來源:連登討論區截圖)

圖片來源:連登討論區截圖、concerthe[email protected]截圖、周國賢@fb

YOU MAY ALSO LIKE ...