中大仔拍短片 喚醒港人

中大仔拍短片 喚醒港人

新年講祝賀說話是常識吧,但同北區,尤其係上水嘅親友拜年,除咗「恭喜發財」、「身體健康」之外,如果你講「光復社區」,可能會收封大利是㗎!
其實北區水貨客「入侵」問題已經唔係新鮮事,但近來再度引起香港市民關注,以幽默方式探討社會問題嘅YouTube創作團隊「一字馬」可謂「功不可沒」﹕佢哋諷刺水貨問題短片《流行上水》,短短3星期就有超過20萬人次睇過,全男班嘅「一字馬」眾成員都話,咁多click rate固然開心,但佢哋更希望觀眾能夠接收到作品嘅中心思想:香港係屬於我哋香港人!

text-Oscar photo-Man

賢仔(左)同堅挺都覺得,大家好易將自遊行同水貨客問題混為一談,但《流行上水》只講水貨問題,所以佢哋「度橋」時都要不斷提醒自己點樣表達先夠清晰。
賢仔(左)同堅挺都覺得,大家好易將自遊行同水貨客問題混為一談,但《流行上水》只講水貨問題,所以佢哋「度橋」時都要不斷提醒自己點樣表達先夠清晰。
其實唔止上水,香港多區都出現水貨客,直接影響居民生活。(網上圖片)
其實唔止上水,香港多區都出現水貨客,直接影響居民生活。(網上圖片)

多得李偲嫣

「一字馬」由3名中文大學現屆及1名已畢業男學生組成,除咗身兼導演、拍攝同剪接嘅賢仔外,堅挺以及訪問當日未能出現嘅家明同Jon Ho都係演員,而諗計度橋都係4個人一齊。雖然唔齊人,但賢仔同堅挺都好落力帶筆者同攝影師去佢哋取景拍MV嘅地方做採訪兼影相,絕對感受到呢兩位年輕人嘅活力。

「一字馬」呢個名好似好古怪,賢仔笑笑口話:「我哋4人本身係校內網台『一字馬』嘅前任莊員。『一字馬』呢個名係嚟自林保怡名曲〈一字馬〉嘅歌詞『男人心一字馬』,顧名思義,我哋嘅節目係講男人嘢嘅。」「一」4位成員雖然已經落莊,但佢哋嘅友情非常深厚,決定繼續用「一字馬」呢個名拍短片自娛,但作品從未公開播放過,直至……

「令『一字馬』被大眾認識,真係多得李偲嫣!」去年嘅雨傘運動令唔少「weroes」誕生,「一字馬」亦係其中一分子,團隊另一成員堅挺話:「當日李偲嫣帶隊嚟中大示威,既然佢主動嚟我哋主場『挑機』,我哋實好好咁『招呼』佢!於是我哋4個度咗幾日,再認真咁拍成《反佔.中大.特輯》,希望俾大眾知道『藍絲帶』對『黃絲帶』嘅無理指控。唯一估唔到嘅係大眾嘅反應竟然咁激烈,只係上載咗幾日就有成10萬人睇過,真係好鼓舞!」

「一字馬」(左起)由賢仔、Jon Ho、家明同堅挺組成,4子一齊「度橋」,但除咗賢仔身兼導演、拍攝同剪接外,其餘3人都係做演員。
「一字馬」(左起)由賢仔、Jon Ho、家明同堅挺組成,4子一齊「度橋」,但除咗賢仔身兼導演、拍攝同剪接外,其餘3人都係做演員。

 

明抽杜如風嘅旅遊節目《流行首爾》水嘅《流行上水》,已經有超過21萬人睇過,係「一字馬」最多人睇過嘅短片。

「一字馬」製作一啲都唔馬虎,實地視察之後,先再決定地點拍攝。
「一字馬」製作一啲都唔馬虎,實地視察之後,先再決定地點拍攝。

要觀眾有嘢落袋

之後「一字馬」差唔多相隔1個月先有另1條短片,每條片都係「一字馬」團員經過連日嘅商討。佢哋話雖然非常認真咁拍攝同度古仔,但之後2條片瀏覽人數只係得幾萬人,令佢哋有一刻好洩氣。賢仔話:「我哋嗰時搞網台,每2星期先播1集,因為我哋覺得就算係製作1個吹水式嘅節目,都應該要做足資料搜集,同仔細商討每個細節,聽眾先會有嘢『落袋』。呢種思維亦用喺拍片上,我哋會諗好每個步驟,因為我哋唔係單單想搞笑,而係想每條片集中帶出1個訊息俾大眾,就好似《流行上水》咁主題要清晰,只係集中講水貨客對居民喺生活上嘅影響,而唔講自遊行問題,唔好俾自己講講下講咗第2樣嘢。

「不過就算幾認真都好,我哋諗法未必同大眾一樣,加上第1條片嘅成功,令我哋有一刻以為每條片都咁多人睇,所以當第2條片出街3個月至今只得7萬幾人睇過,挫敗感都幾大。後來我哋睇番觀眾嘅意見,發現佢哋都好認真咁話俾我哋知邊啲地方需要改善,例如抽水抽得唔夠盡等;佢哋亦會留言話好欣賞我哋,叫我哋加油,呢啲全部都係鼓勵緊我哋要創作更好嘅短片俾大家睇,先令我哋重拾信心。」

 

除咗相機係屬於「一字馬」之外,其他器材都係問學校借用,賢仔重話學校都好支持佢哋探討比較敏感嘅社會議題。
除咗相機係屬於「一字馬」之外,其他器材都係問學校借用,賢仔重話學校都好支持佢哋探討比較敏感嘅社會議題。

帶起社會議題

就好似探討近期水貨客問題嘅《流行上水》咁,「一字馬」由度橋、視察環境、拍攝及剪接,花咗近1星期,換嚟超過21萬人睇過,亦重新喚起大家對香港水貨客問題嘅關注。「『喚起』就太言重喇!我哋只係希望將社會議題話俾身邊嘅人知。」堅挺話:「我身邊唔少同學都唔睇新聞,亦有好多朋友唔係住上水區,所以根本唔知水貨客嘅問題有幾嚴重。我哋拍攝之前,都係估計水貨客只活躍喺火車站附近,但原來水貨客會去到離車站15分鐘路程咁遠嘅天平邨掃貨,咁絕對會影響居民日常生活。我哋拍《流行上水》,就係希望大家睇完之後,親自走去水貨客問題嚴重嘅地區視察,亦希望大家明白,水貨客問題唔存在你住緊嘅地區,唔等於唔關你事,因為問題繼續落去,遲早就會去到你屋企樓下。」

《流行上水》之後,「一字馬」積極籌備新短片,不過大學生活總有完結一日,未必可以再好似而家咁有時間,可視拍片為課餘自娛活動,但賢仔同堅挺都相信,「一字馬」唔會因佢哋畢業而解散。「『一字馬』從來都唔係我哋嘅搵錢工具,而且我哋4個喺創作上已經建立咗默契,多1個、少1個都度唔掂,所以將來即使工作有幾忙,我哋都會慢工出細貨,除咗繼續自娛,更希望令香港人關心多啲自己住緊嘅地方。」

「一字馬」好鍾意喺片入面抽水,特別係林峯,大家睇嘅時候不妨留意下。
「一字馬」好鍾意喺片入面抽水,特別係林峯,大家睇嘅時候不妨留意下。

《反佔.中大.特輯》

「一字馬」首套作品《反佔.中大.特輯》,喺李偲嫣(小圖)到中大示威時拍攝,起初係諗住當時雨傘運動氣勢稍弱,希望藉住條片等大家再次關注運動。

 

《行動代號:禮義聯》

《行動代號:禮義聯》玩特工feel,最後係叫大家登記做選民。

 

《變變變生命力:香港人》

《變變變生命力:香港人》係佢哋嘅第2條短片,內容諷刺香港人適應力太強,反而令佢哋對好多事變得麻木,觀看人數至今只得7萬幾人。

YOU MAY ALSO LIKE ...