【這就是青春】姜河那飲咗先講

流行娛樂

廣告

去年因電影《少女怪談》而首次訪問姜河那,上星期佢為電影《20 TWENTY》再次嚟到香港,態度依舊誠懇友善,依然樂於同記者們玩selfie,唯一不同嘅係頭髮短到不行嘅佢,喺過去1年先後接拍咗1劇4戲,喺韓國今時今日演員一籮籮嘅情況之下,能夠有此產量,實在值得鼓掌。

喺電影《20》中,姜河那夥拍金宇彬以及男團2PM成員俊昊,飾演20出頭,又要威又要戴頭盔、被阿妹撞破睇甜片嘅書呆子。首次挑戰喜劇,姜河那話原來忍笑比扮醉、摸胸更難。

text-Phoebe photo-Pakco

由頭飲到尾
戲中金宇彬、俊昊同姜河那性格各走極端,但最終都因愛上同一女生而大打出手,又繼而成為好友。現實中,姜河那就話自己未試過同朋友睇中同一目標,不過平日愛飲清酒同威士忌嘅佢,就試過好似喺戲中角色咁,因酒醉而出事。
「20歲嗰陣讀書唔算好叻,但就好鍾意玩,戲中有好多幕飲酒戲,雖然自己酒量好,但拍攝嗰陣都係用水代替,你睇就幾分鐘啫!但實際拍攝係幾個鐘,冇可能一直飲。(酒量有幾好?)每次同朋友去飲酒,我多數都係由頭帶到落尾嗰個,不過有次做完音樂劇之後,因飲得太多,太開心,最後瞓咗喺街。」

內容延讀

>【攞定紙巾抹鼻血!】NMB48三點式MV

>重遊十大《大時代》經典場面,有幾多個地方你認得?

冇時間表白
戲中金宇彬有女即媾,相反姜河那就一味死等。「現實中,我都未必敢咁直接去表白,但心入面都會諗:『如果同到佢拍拖就好喇!』當然,我亦都唔會死等啦,見時機成熟就會表白。」
作為大勢演員,相信都遇過唔少排隊表白嘅粉絲啦。「哈哈!拍完《20》之後,即刻又拍另1部電影,每日就係起身、開工、收工,莫講話表白,根本連見其他人都冇時間識。的確舊年拍咗好多作品,一路去演嘅時候,其實負擔感都有,有時都諗點可以演好啲?演技有冇進步?但呢啲都係留俾大家判斷,但我覺得隨住自己年紀嘅增長,見識多咗,睇嘅嘢亦多咗同廣闊咗。」

內容延讀

>【夏日髮型教學片】堅2分鐘唔使!教你擸到畢彼特咁型…嘅ALL BACK頭

>蛋黃哥日本排名勝一姐KITTY﹗13件必敗蛋黃哥新品

韓國票房理想
導演李炳憲同拍檔姜炯哲曾為《極速緋聞》、《陽光姊妹淘》同《千術之神》編劇,《20》係佢首次自編自導作品,問佢有冇向拍檔姜炯哲請教,佢就話之前嘅作品,佢都有喺拍攝現場偷師,重講笑咁話因為嫌煩,所以費事問。至於點解1次集齊韓國3位大勢演員,佢話:「好多人都好羨慕點解會成功將呢3個國內大勢演員聚埋一齊,其實最難係就佢哋3位嘅檔期,不過都係同佢哋嘅公司去傾,過程當然需時啦,亦可能因為咁而要某啲演員辛苦啲,喺度都要同佢哋講聲唔好意思。其實3位收到劇本之後都覺得好有趣,好想做啲同現實生活中年紀差不多嘅角色,所以冇特別去說服佢哋參演。」

《20》早前喺韓國上映時,雖然係淡季檔期,但都有300萬觀影人次,成為韓國今年第2部過300萬嘅本土電影,令導演自信即時提升。「當然開心啦!但我一直都認為電影唔係我1個人嘅事,我希望可以同觀眾有交流,而今次似乎真係做到。」

YOU MAY ALSO LIKE ...