〈日日去鳩嗚〉華dee:扮嘢唔似先好笑!

〈日日去鳩嗚〉華dee:扮嘢唔似先好笑!

上年年尾嘅一場「雨傘運動」,激發起香港一眾年輕人嘅無限潛能,證明香港人都可以好有文化、好有創意。

好似今次被訪嘅製作團隊「學舌鳥Mocking Jer」,就係由於「雨傘運動」,整咗條諷刺警察嘅惡搞片《陳浩南教書篇 2014〔警察招募日〕》放上網,因爆笑得嚟又好有意思而開始被網民認識。無耐,佢哋再拍咗條模仿劉華〈獨自去偷歡〉MV嘅惡搞版〈日日去鳩嗚〉影片,一放上網即瘋傳,主角「華dee」亦因此爆紅,佢重話,啲網民就係鍾意佢扮得唔似…

text – Jessie photo – Rover 、網上圖片

〈日日去鳩嗚〉大受歡迎,其中1個原因係個MV真係好有懷舊感覺。阿修話:「我哋拍嘅時候用咗3部機,以快閃形式進行。事前已經諗晒啲鏡頭同效果,例如打斜個鏡頭、好快嘅zoom-in同out,全部都係參考90年代嘅MV製作。剪完之後就交俾另1個朋友做後期,整矇個畫面,總之盡量做到懷舊feel。」
〈日日去鳩嗚〉大受歡迎,其中1個原因係個MV真係好有懷舊感覺。阿修話:「我哋拍嘅時候用咗3部機,以快閃形式進行。事前已經諗晒啲鏡頭同效果,例如打斜個鏡頭、好快嘅zoom-in同out,全部都係參考90年代嘅MV製作。剪完之後就交俾另1個朋友做後期,整矇個畫面,總之盡量做到懷舊feel。」

http://www.youtube.com/watch?v=u1mWOeAMONA

01

「Mocking Jer」主要成員:

「學舌鳥」名字靈感係嚟自電影《飢餓遊戲》,象徵自由、反叛。而同時英文Mocking Jer亦有諷刺、模仿嘅意味。

阿修(左):網民稱為「浩南哥」。畢業於演藝學院編劇系,freelance導演、編劇、演員,現為某雜誌社全職員工。

阿dee(中):網民稱為「華dee」。習舞已7年,現為freelance dancer及演員。

阿天(右):畢業於演藝學院導演系,而家從事導演、副導演及編劇工作。

 

劉華=o靚坤

扮演華dee嘅阿dee,原來喺「學舌鳥」處男作「陳浩南教書篇」已經扮過華仔,喺片中佢被點名爬上檯唱過兩句「日日去鳩嗚」,出咗唔夠10秒,但就搶晒鏡,已經有唔少網民like佢,重留comment笑佢似o靚坤多啲,又有人問可唔可以俾佢唱多兩句。本身「學舌鳥」團隊一直都想嘗試翻拍MV,於是順理成章投入製作。佢哋用咗兩日共10小時拍攝〈日日去鳩嗚〉,影片上傳唔夠1個月,已經有超過63萬views。

阿dee話:「從來冇諗過自己會扮劉華,重可以用呢樣嘢上位。原本諗住惡搞俾大家笑下輕鬆下,點知一嘢爆紅。我到而家都唔相信,心諗:『吓!咁都得?』」

〈日日去鳩嗚〉成功,除咗因為高登巴打嘅詞改得抵死,重有阿dee「精湛」嘅模仿技巧。「拍之前我冇特別走去睇劉華啲戲,反而平時阿修好鍾意失驚無神扮劉華,我係模仿佢嘅扮嘢神髓,MV入面把歌聲都係阿修把聲嚟。我到而家都只係識扮劉華嘅招牌不覊似笑非笑表情,再放大佢一啲小動作,例如舔脷、手指指向天咁,不停重複又重複,咁就造就咗個苦過dee dee嘅華dee出嚟。」阿修喺旁邊搶住講:「阿dee成功唔係因為佢扮得似劉華,係因為佢扮得夠唔似,重夠晒樣衰!」

 

睇下以下嘅原裝版本就知「學舌鳥」佢哋有用心研究過先模仿,感覺都有8成似。

粉絲留言:「打爆你個頭!」

劉華話晒都係民間特首,粉絲眾多,模仿有冇引起忠粉反感?阿dee話:「點都有啲嘅,有個嚟自台灣嘅粉絲,留言話唔明點解我要扮華仔扮得咁醜樣,好想打爆我個頭!我覺得好好笑,都預咗會有呢啲反應。另外,亦有自稱係資深華仔天地嘅粉絲,佢話佢係支持嘅,但唔明點解要用個咁嘅表情嚟扮華仔。」

華dee呢個角色喺網上爆紅,但阿dee話暫時未因而多咗表演機會。「係有多咗訪問,出街有人會搵我影相咋!啲人通常嚟嚟去去都係嗰啲反應,1種就係會細細聲問隔籬個friend,嗰個係咪鳩嗚嗰個?另1種就係直接衝過嚟話想同我影張相。對我嚟講,呢排最麻煩係影相時唔知俾咩表情。但通常都係嗰個招牌表情,啲人就會話好似呀好似呀!而家咁都開心嘅,但其實有時諗起都會有啲沮喪,點解唔係做番自己,而係模仿先有人同我影相、先有人識?我自己都想盡快撇甩呢個角色。不過,如果佢哋鍾意,我又唔介意繼續扮落去嘅,能夠為大家提供娛樂同快樂都幾好。」

所謂做戲做全套,講得係模仿復古,所以佢哋連Yes! card都自己設計埋。上圖係華dee,下圖係一直同「學舌鳥」合作嘅2人女子YouTuber組合「易劉」。
所謂做戲做全套,講得係模仿復古,所以佢哋連Yes! card都自己設計埋。上圖係華dee,下圖係一直同「學舌鳥」合作嘅2人女子YouTuber組合「易劉」。

惡搞始於浩南哥

「學舌鳥」呢個團隊之所以會出現,一切都因為阿修。佢上年曾喺紅絲帶中心同香港同志影展協會製作嘅電影《愛,不難》中,同演員陳家樂飾演1對同志情侶,亦喺《狂舞派》導演黃修平上年8月開拍嘅新戲《愛的根源》入面飾演少年林海峰。

阿修上兩個月「鳩嗚」時,突然想到拍惡搞片有得諗喎!於是就gather埋啲做幕前同幕後嘅朋友一齊玩,所以由一開始,「學舌鳥」嘅台前幕後製作團隊,基本上都係因為阿修而認識。佢哋嘅首個作品,係以《古惑仔4之戰無不勝》中,陳浩南走入1間野雞中學做代課老師嘅情節為藍本,而創作出1條惡搞「警察招募日宣傳片」。「《古4》中陳浩南有句:『點解想做蠱惑仔?巴閉囉!英雄主義、疊馬,我唔妥你可以(扌豆)你,我唔鍾意你可以(扌耷)你。』我覺得只要改一改,就可以放落條警察招募惡搞片度,重要十分貼切,好符合現時情況,好諷刺,成個靈感就係嚟自呢度。」

阿修因「學舌鳥」嘅處男作而被網民稱為浩南哥。「其實一開始會用呢啲名,都係費事出真名,但而家報紙雜誌都寫晒名出晒相,都冇得避。大家都咁叫,我冇乜所謂,可能下1條做第2個角色,又會改嗌第2個名呢。」
阿修因「學舌鳥」嘅處男作而被網民稱為浩南哥。「其實一開始會用呢啲名,都係費事出真名,但而家報紙雜誌都寫晒名出晒相,都冇得避。大家都咁叫,我冇乜所謂,可能下1條做第2個角色,又會改嗌第2個名呢。」

唔想變商業

阿修好耐之前已經有諗過拍一啲微電影擺上YouTube,因覺得自由度幾大。「但今時今日,尤其928之後,政治已經成為香港所有階層都討論嘅議題,如果拍嘅片同政治冇關,反而會令我覺得係咪特登避開呢?不過『學舌鳥』係咪一定要做關政治事嘅嘢?我又覺得唔係,但現階段構思到嘅題材,都全部咁啱關事。如果有日,我突然諗到啲橋係唔關事嘅,我哋一樣會拍㗎!」

3人話而家都有廣告商同佢哋接洽,但內心都相當掙扎,因為當初拍嘢嘅動機唔係商業,唔係想賺錢。阿修:「當時一心只係想拍自己想拍嘅嘢,但係如果要拍落去嘅話,呢啲商業工作係需要,否則一直嘔錢同時間出嚟,會非常吃力。所以暫時嘅想法都係只要有人肯搵我哋試,我哋都會接,又可以多啲實戰機會,試唔同嘅嘢。不過全部都未傾成,交咗ideas,對方考慮緊。」嚟緊「學舌鳥」會同近期爆紅嘅page「墳場新聞」合作,拍攝「墳場動新聞」。另外重會拍條叫《激戰獅子山》嘅影片,以張家輝喺電影《激戰》中嘅角色,向包括最先登上獅子山掛黃直幡嘅蜘蛛仔,同埋其他喺唔同山頂掛過嘅人致敬。

 

爆笑翻拍惡搞片

其實惡搞翻拍MV喺創意無限嘅網絡世界入面,可以搵到嘅又點會只有1、2個咁少?再介紹多4個爆笑MV俾大家輕鬆下!

 

除咗真人版,網絡創作團隊「DDED HK」重整咗條佢哋一貫style嘅可愛版8-bit MV,一樣可幫大家苦中作樂。

 

講到近年難忘嘅作品又點少得喺2012年,余文樂喺電影《春嬌與志明》入面模仿王馨平經典金曲〈別問我是誰〉MV,當時好多人睇完都大讚樂仔好「靚女」!

 

喺日本綜藝節目入面,演員將《足球小將》動畫片頭惡搞成真人版,每個鏡頭都跟到好足,製作認真,出嚟效果極好笑!

 

上年內地出現咗首由筷子兄弟主唱嘅神曲〈小蘋果〉,紅到連韓國人氣女團T-ara都搵佢哋一齊合唱韓文版。有大陸網民將北韓領導人金正恩、美國總統奧巴馬、俄羅斯總統普京等人嘅頭像key落唔同影片,串埋再配上〈小蘋果〉,成為〈三胖版小蘋果〉,喺網上爆紅,卻引嚟北韓不滿,目前大陸已禁播。

YOU MAY ALSO LIKE ...