曾志偉改革未得歡心！大股東黎瑞剛力斥TVB五大罪：大灣區開設新製作中心

撰文：神仙b｜圖片：TVB截圖、東方新地｜編輯：海月

曾志偉改革未得大股東歡心

作為TVB大股東嘅黎瑞剛日前接受訪問稱：自己對TVB「非常不滿意」！佢直接力斥TVB節目老化、製作技術落後、內部山頭林立、管理層決策失誤及電商用戶體驗差呢五條大罪。

黎瑞剛直言TVB呢幾年越來越難吸引後生仔，佢強調節目要引入更多創意。佢日後將積極參與TVB的運作，製作一d內地青年嘅創富故事，用來啟發香港嘅後生仔。

重要嘅事講三次 黎瑞剛三次強調自己對TVB唔滿意

黎瑞剛形容TVB迷失咗十年，對TVB大台嘅形容係「不滿意，不滿意，而且係非常不滿意」，更痛批TVB上至管理團隊，下至節目，都呈現全面老化同創新乏力嘅情況。係節目創作能力老化嘅情況下，TVB管理層仲山頭林立，難以形成合力。

同時，黎瑞剛認為管理層收購決策亦存有失誤。佢認為買入星美控股債券並非一個良好嘅決定，呢幾筆交易導致TVB蒙受重大損失，撇賬高達8.3億元。

而TVB近幾年投入重金發展嘅電商業務「Big Big Shop」亦讓黎瑞剛感到不滿意，佢直言：使用體驗「很差」！

TVB節目製作落後 將發展中心放於大灣區

黎瑞剛指TVB製作水平已經落後於內地，佢並不指望曾志偉同王祖藍能一下改革成功，稱TVB應該更加開放，並且暗指會安排內地節目製作人員進駐TVB製作以大灣區為核心嘅節目。

目前TVB已經積極喺大灣區「插旗」，黎瑞剛透露將會喺大灣區開設新嘅製作中心，TVB正積極同廣東省政府磋商，預計能於2至3年內完成相關建設。