賀碧咸ig開張!重溫碧咸震撼世界的10個髮型

流行娛樂

廣告

是咁的,唔知大家有冇喺fb成日睇到啲「十三億人震撼了」、「不能不傳閱,因為可能會救你一命」、「這貼子看10次也夠,你還未看嗎?」標題嘅文章,其實,有時會被呃咗入去睇,睇完又唔知啲嘢係咪當事人所講,不過,日前,碧咸突訪香港,就一定係真,見到佢唔踢波都依然咁型,令我回想起那些年追碧咸⋯⋯髮型嘅年代,以下10個,你可看能睇過,但叫你睇多次又有乜所謂?(我條題擺明抽水的)

text-譚大偉

第1位

初出道嘅碧咸,青靚白淨,未開始搞形象,所以髮型都係典型嘅英國仔髮型,雖然有少少薯,但人靚仔冇計,救番晒。

第2位

1球半場笠射,令佢1球成名,而開始受全球注視,髮型亦開始轉變,呢個73金毛頭,當年你身邊總有朋友嘗試扮過,就連我哋民間特首劉華都跟過,就知呢個髮型影響力有幾大。

第3位

當年男人長髮,就代表型嘅年代,碧咸1句唔該,剪短晒,重玩摷亂,結果,當年個個男仔都要去搵髮泥(當年好難搵),每次出街都要摷半粒鐘先出門口囉!

 

第4位

當大家追求緊gel咗好似冇gel嘅時候,咸哥就gel個大家一直覺得唔太型嘅雞冠頭出嚟,此頭一出,陳冠希都要跟,而各位男士就由亂摷,變成雙手一夾,出門口快好多。

 

第5位

好多時,我哋都話髮型的重要性,但呢句說話好似唔啱咸哥用,夠膽剷青唔係勁,剷完都咁型嗰下佩服,自問當年冇膽跟佢剷,但身邊依然唔少朋友死跟,結果好多都出晒事。

 

第6位

剷青係型係方便,但缺點係冇變化,之但係咸哥,留咗中間整個雞冠頭變奏版,夠搶鏡又夠型,就連朗拿度當年都跟整風,整個河童頭,有型度當然差好遠。

第7位

愛少年時代,有本錢真係想點搞都得,不過呢個有少少出事,同咸哥唔多襯。

第8位

轉會到皇馬,咸哥就玩返長髮,整條馬尾,喺球場上跑確係型嘅,之後好多長髮球員都有樣學樣。

第9位

隨住年紀,咸哥都keep咗好耐長髮look,不過都有變奏出現,好似用Headband咁,雖然都好多人都有跟風,不過真係自量下先好跟,你話帶頭箍出街真係好易變MK。

第10位

近年,咸哥都變咗咸佬,個人成熟咗,髮型都唔好可太年少輕狂,不過人型真係冇計,梳完個飛機頭,大家又要買髮蠟學點gel。

內容延讀:

70年代至今 本地男生髮型進化史

潮星髮型第2集 實有款你跟過

你重未測?HOW-OLD ELSA同IRON MAN?

 

There is 1 comment

Add yours

Comments are closed.