食住花生等睇!6大最期待韓劇預告

食住花生等睇!6大最期待韓劇預告

上年嘅《來自星星的你》之後,一直未有另一套更爆嘅韓劇彈出,終於等到今年夏天,一套比一套令劇迷期待嘅韓劇等住出街,以下即精選6套韓劇,期待指數以5粒星為最高,各位食住花生等睇劇啦!

text-Tammy photo-互聯網圖片

1.《Producer》(製作人)

電視台:KBS

主演:金秀賢、孔孝真、車太賢、IU、金鍾國

編劇:朴智恩(大熱前作《來自星星的你》)

期待原因:預計5月8日播出嘅週五、週六新劇《製作人》(又名《製作人的那些事》),演員陣容華麗,繼有1對收視保證嘅男女主角金秀賢同孔孝真,又有《我的野蠻女友》車太賢、「國民妹妹」IU,重有出道廿年首次拍劇嘅《Running Man》「能力者」金鍾國,加埋由金牌編劇朴智恩編寫嘅電視台製作人故事,台前幕後都卡士強勁,真係金鍾國緋聞女友尹恩惠都要睇呀!

期待指數:***** (最期待的組合出現了!)

金秀賢、孔孝真
金秀賢、孔孝真

2. 《愛你的時間,7000天》

電視台:SBS

主演:河智苑

編劇:敏孝正 (大熱前作《浪漫滿屋》)

期待原因:將熱爆台劇《我可能不會愛你》翻拍,未開拍,先贏話題性。女主角現已鎖定《秘密花園》、《奇皇后》收視女王河智苑做韓版程又青,咁李大仁呢?先後傳出《咖啡王子》孔侑、《主君的太陽》蘇志燮,但似乎Rain最有機,睇嚟快有定案,因為套劇今年上半年要出街喇!(4月1日更新:大仁哥確定由《九回時間旅行》男主角、孔孝真前男友李真旭出演,導演為《清潭洞愛麗絲》、《聽見你的聲音》、《Pinocchio》趙秀沅,預計於6月播出。)

期待指數:**** (期待韓版又青姐、大仁哥!)

河智苑將演出韓版《我可能不會愛你》。
河智苑將演出韓版《我可能不會愛你》。

3.《Who Are You-學校2015》

電視台:KBS

主演:待定

編劇:金賢貞、金敏貞

期待原因:預計4月27日播出嘅週一、週二迷你劇《學校》系列之 《Who Are You-學校2015》,以江南名門高中私校為背景,講述顛覆雙胞胎姊妹命運嘅懸疑校園故事。演員人選方面,李侑菲、CNBLUE姜敏赫先後辭演,暫時以童星出身嘅金所炫演出機會最大。雖然演員陣容未定,但係《學校》系列一向有口碑、有收視,好前之前由張娜拉、崔丹尼爾、李鍾碩同金宇彬主演嘅《學校2013》就係個好例子。

期待指數:***(青春校園劇不死!)

《學校2013》
《學校2013》

4. 《回答吧1988》

電視台:tvN

主演:成東日、李日花

編劇:李祐汀(大熱前作《回答吧1997》、《回答吧1994》)

期待原因: 《回答吧1997》、《回答吧1994》都係有口碑兼高收視之作,而《回答吧1994》更加創下韓國有線電視台收視率最高嘅電視劇紀錄,《未生》都只可以排第2。李祐汀編劇、申元浩導演打造嘅《回答吧》系列大成功,當然唔好俾佢停,預計今年下半年播出嘅《回答吧1988》,第3度搵嚟成東日、李日花扮演女主角嘅父母,其他人選有待稍後確定。

期待指數:**** (綠葉先勝!)

《回答吧1997》、《回答吧1994》
《回答吧1997》、《回答吧1994》

5. 《濟州島蓋茨比》(又名《濟州島溫暖》/《心情好又溫暖》)

電視台:MBC

主演:待定

編劇:洪貞恩、洪美蘭(大熱前作《原來是美男》、《最佳愛情》、《主君的太陽》)

期待原因:5月起,逢週三、週四開播,以濟州島為背景嘅浪漫愛情喜劇,係洪氏姊妹繼《最佳愛情》之後,第2次同朴洪均導演合作,班底質素有保證。男女主角本來屬意金宇彬同姜素拉,不過金宇彬已經推咗呢個首次做韓劇男主角嘅機會,據知Rain亦有收到邀請出任男主角,不過重未落實演出。

期待指數:***(有靚景睇!)

濟州島風景優美,多齣韓劇如《秘密花園》、《宮》都曾經喺度取景。
濟州島風景優美,多齣韓劇如《秘密花園》、《宮》都曾經喺度取景。

6. 《華政》

電視台:MBC

主演:車勝元、李妍熙、金載沅、徐康俊、金昌完、鄭雄仁、金汝真

編劇:金伊英(大熱前作《馬醫》、《同伊》)

期待原因:4月13日開始,逢週一、週二播映,係型爆熟男車勝元首套古裝劇,佢嘅角色係大家耳熟能詳嘅朝鮮時代君主光海君,內容講佢喺父王宣祖嘅厭惡同排斥下,點樣成功登上王位。首條預告片已經出咗,大家都讚車大叔氣場勁!

期待指數:***(車大叔好有型!)

《華政》
《華政》

《華政》預告片:

延伸內容:

海綿寶寶 操肌拍戲

治癒系最高之韓國拉花Cafe

 

 

YOU MAY ALSO LIKE ...