【恭喜蕭生蕭太】蕭正楠頒獎禮上公布已與黃翠如結婚!4年戀情修成正果!

電視

廣告

今年《萬千星輝頒獎典禮2018》,除咗大小姐終於得獎、Ali成為視后,全晚最爆嘅一幕就一定要數蕭正楠同曹永廉拎「最受歡迎電視拍檔」。令人震撼嘅並唔係個獎,而係蕭正楠喺頒獎禮上,公開稱呼翠如BB做太太呀!

撰文:東方新地|編輯:AuntieSam|圖片:myTV、新傳媒圖片庫、黃翠如IG蕭正楠IG

蕭正楠黃翠如結婚 四年戀情終開花結果

蕭正楠同曹永廉憑《兄弟大茶飯》奪「最受歡迎電視拍檔」,由黃翠如、洪永城頒獎。蕭正楠講得獎感受時,正式公開黃翠如為太太,令全場藝員同事超驚喜!

蕭正楠:「Sorry sorry,我係好心神彷佛,拍戲或有人嗌我都唔知,我一直諗啲好浪漫嘅嘢感動我太太,但我個腦仔有限,唔識講好多嘢,好緊張,緊張咗成晚,我都唔記得要多謝你乜嘢。我多謝你令我學識去照顧人,令我學識做個更加好嘅男人,今晚呢個承諾都好大鑊,因為全香港人都知道。」黃翠如終於開口:「夠喇,夠喇,頒獎禮嚟㗎。」蕭正楠就聽話唔再繼續﹕「多謝大家畀呢個機會我講,多謝晒!」

二人非常激動,其他同事都紛紛上前祝賀!

 

蕭正楠狂儲老婆本

蕭正楠與黃翠如拍拖四年無風無浪,早已同居雙方又見晒家長,多次被傳婚訊但只聞樓梯響,原來只欠蕭正楠一個行動。出身小康之家的蕭正楠是個很穩陣的人,與黃翠如拍拖後,他的事業開始有起色,形象入屋後,拍劇做男一廣告代言亦接踵而來,不過他自覺財力未夠,未係時間娶黃翠如入門。

據知情者透露:「Edwin (蕭正楠) 好怕人哋話佢係百億女婿,佢想真係儲到一筆錢,買到一層樓畀翠如揸手先諗結婚,所以到依家仍未正式向翠如求婚,佢話想留個美好嘅回憶,到時一定會有大大粒鑽戒,唔會令翠如失望。翠如知道男友咁為佢又上進當然開心,不過佢10月就37歲,再加上佢唔係好想上位爭視后嗰種人,所以舊年停工周遊列國做慈善探訪,Edwin就留喺香港拍劇拍節目繼續搏殺,翠如話就話唔急結婚,因為佢唔想公開畀太大壓力Edwin,不過佢睇愛情睇得咁重,點會唔想結婚?早前翠如帶Edwin返娘家食飯,翠如屋企人都有提過結婚嘅事,翠如即場幫Edwin擋駕話有晒計劃,畀埋最後通牒Edwin,希望一年內會成事。其實Edwin同翠如都係好慳嘅人,除咗日常生活基本開支,最多就係去旅行,佢哋一齊儲緊錢,應該都離目標唔遠。」要娶父親是上市公司主席黃永華的「百億千金」黃翠如入門,蕭正楠當然要努力搵銀,除了在無綫拍劇keep住人氣,兩年前年他積極進軍飲食界,投資漢堡包店做老闆,經營一年多生意已上軌道,至今已開設分店成功滾大老婆本。

收到女友的最後通牒,蕭正楠當然要加快腳步,最近被問何時結婚,他終於有實質答案:「希望不久嘅將來會結啦,結婚要計劃好多嘢,你估好似《天若有情》咁,捉佢上電單車,掟個垃圾桶,攞件婚紗就話結婚咩?好多嘢要安排,照顧雙方家長好多嘢要搞。」

翠如抑壓太耐要釋放

為了畀時間蕭正楠在事業上衝刺,黃翠如刻意放慢自己的腳步,停工差不多一年的她,走訪多個第三世界國家,跟健身教練做運動又學打鼓,盡量充實自己填滿自己的時間表,等了又等的她在今年8月《美女廚房》終於真情流露。蕭正楠曾多次公開表示女友是地獄廚神,亦未曾正式食過黃翠如親手煮嘅嘢,今次黃翠如亮相他主持的《美女廚房》,第一回合煮羊滕只有蕭正楠肯食晒,不過都係畀1分,其後煮自選菜色時,黃翠如的魚粥獲所有男評判一致讚賞,蕭正楠更被慫恿即場拎出戒指求婚,又大叫二人要去紅棉道註冊,就在蕭正楠扭扭擰擰不知如何是好時,黃翠如突然委屈到喊出來,最後蕭正楠尷尬地走出去攬攬女友安慰完場。

呢一喊好充分咁表現出黃翠如內心係幾咁脆弱,幾咁想成為蕭太受到保護,唔好睇佢平時男仔頭,其實都有一顆恨嫁的心,如果蕭正楠鍾意食魚粥,咁就一定更加唔可以錯過,最後通牒都出埋,愛得太遲嘅後果分分鐘冇艇搭㗎!(不過好彩,蕭生蕭太最後都上到呢班艇)

 

回顧翠蕭戀4年甜蜜時刻

咁多年嚟鏡前鏡後,兩位都大力放閃!而其實佢哋已經拍拖4年,最早萌芽於拍攝《師奶MADAM》之時。翠如喺「定情劇」中飾演由千金小姐變做屋邨師奶的女卧底,而蕭正楠就飾演翠如嘅兒時夢中情人,與翠如扮演夫妻,一同查案。劇中二人有情人終成眷屬,由假夫妻變成真夫妻,而喺現實生活中,Edwin都一樣係翠如BB嘅Mr. Right!個個都Like爆佢哋,二人仲多次一齊奪得 熒幕情侶獎添!

緊張男友

早已同居的蕭正楠與黃翠如,相處如老夫老妻,之前黃翠如在IG放穿bra top做瑜伽的照片,蕭正楠即投訴。

黃翠如 買康樂園做嫁妝

黃翠如貴為一線花旦,吸金能力不容忽視,入行多年的她一直希望靠自己上車買樓,早前本刊記者見她揸車到大埔娘家接完三妹黃麗茵,再駛去大埔康樂園睇樓,知情者透露:「翠如娘家喺大埔,所以佢都想買番大埔嘅樓,佢依家嘅同居竇華景山莊係Edwin同屋企人買,翠如好想有個自己夢寐以求嘅愛巢,康樂園嘅獨立屋就最啱佢心水。」現時康樂園一個千多呎的獨立屋要2千萬起錶,對於黃翠如來講絕對負擔得起。

戴愛情手繩

娘家接三妹

本刊記者見黃翠如把車停泊在康樂園物業服務處門口,即上前採訪,黃翠如聲稱是陪細妹來辦事,問到何時有婚期?她說:「冇特別都係咁!暫時都係咁!」對於有指蕭正楠好衰,遲遲未有求婚,她反應極大:「呢樣嘢你自己同佢 (蕭正楠) 講啦!」兩姊妹去完康樂園就返回位於大埔寶馬山的娘家,未幾蕭正楠收工亦由曹永廉送到屋苑門口,見他拎住盒芝士撻,看來是孝敬未來岳父岳母。蕭正楠在黃翠如娘家食埋晚飯才離開,由他揸車載住黃翠如一起返回華景山莊,返到屋企黃翠如先上樓,蕭正楠負責泊車。

𥄫中康樂園築愛巢

蕭公子駕到

黃翠如兩姊妹睇完樓返回大埔娘家兩小時後,蕭正楠亦坐曹永廉車到達,見他拎住盒撻落車,相熟管理員亦自動波開門讓他入內。

甜蜜返家

在黃翠如娘家食完晚飯睇埋電視,蕭正楠負責揸車同女友一齊返屋企,拍拖4年仲話怕醜,要前後腳入大廈喎!

二人再次回應結婚一事,黃翠如將個波推畀蕭正楠,自己匆匆上樓,而蕭正楠亦笑笑口話:「唔講呢啲啦!」又係拖字訣。

 

 

 

黃翠如37歲生日會

黃翠如早前37歲生日,男朋友蕭正楠就大搞咗一個全男班嘅生日會同女友翠如BB慶祝,包括曹永廉、楊潮凱、區永權、袁偉豪等都有到場為壽星女祝賀,認真夠哂熱鬧!

各位猛男仲大合唱咗首生日歌送俾壽星女,有男朋友同成班型男齊齊為自己唱歌,成功氹得翠如BB勁開心!

個個男士都落力為壽星女唱生日歌,絕對唔係兒戲了事!

蕭正楠送蘋果蛋糕

有咁多人同翠如BB慶祝生日,生日蛋糕又點止得一個呀?踏正12點,壽星女就捧出第一個生日蛋糕。其後,男友蕭正楠再捧出一個巨型蘋果蛋糕!

蕭正楠送嘅呢個巨型大蛋糕造型非常特別,猶如無重量限制咁掛喺樹上,唔講都唔知原來係一個真正食得嘅蛋糕!

蘋果樹蛋糕暗藏浪漫含意

不過原來蕭正楠之所以揀蘋果樹蛋糕,就係同定情劇《師奶Madam》有關係!當時黃翠如於劇中飾演花蘋,而蕭正楠就飾演羅大樹。

因此,今次蕭正楠送心型大樹裡有一個大蘋果嘅生日蛋糕,明顯係想表達羅大樹一直深愛住花蘋!果然好有心思之餘,仲好浪漫!

黃翠如更喺個人社交網開心留言:「謝謝蕭一,為我準備了一個全男班的生日飯,一班男人的約會,總覺得我也是男人的一分子。謝謝各位俊男,祝黃二我生日快樂。」,睇嚟壽星女今年生日應該好難忘啦!

黃翠如父親黃永華曾任聯旺集團(8217)行政總裁兼執行董事,16年4月聯旺上市時,黃翠如曾攜蕭正楠現身道賀。

愛情來了的《美女廚房》!黃翠如公然叫蕭正楠除衫!

蕭正楠同黃翠如打情罵俏打到上《美女廚房》,眾人梗係要食吓花生、抽吓水啦!點知不敵閃光彈,張振朗淨係企喺一邊都頂唔順,開口講笑話自己都係出返去先啦!

其中一幕,廚房門一打開,黃翠如攞住菜刀質問眾人:「你哋邊一個踩我!」,吳卓羲立即指向蕭正楠:「佢(蕭正楠)話身材好過你。」

黃翠如即刻回應:「除衫!睇你係咪好過我!」,點知,抵死嘅蕭正楠神回:「你知㗎!」真係閃到冇人有啊!!!

完美男友蕭正楠

讚還讚,成集蕭正楠讚黃翠如冇停過口,連女友切幾片薑都讚!

梗係搞到全場嘩然!

阿BOB忍唔住窒吓蕭正楠,叫佢諗吓有無嘢可以批評到黃翠如!蕭正楠即刻表示:「我見到完美!」

想做100分男友嘅命運係咁㗎喇!

深情對望

黃翠如喺第一輪嘅菜式獲得除咗蕭正楠以外嘅人嘅一致負評,但阿蕭喺翠如深情嘅目光下,竟然講得出:「其實好甜!」然後再Chok爆回望翠如,真係唔使加Effect到感覺到佢哋有幾Sweet啦!

愛情來了的《美女廚房》

試食咗少少,蕭正楠Man咁爆咗一句:「無人欣賞你,我欣賞你。」再嗱嗱塞哂翠如煮嘅餸落口,哇,真係感動全場!

一個男人能夠搵到個願意煮飯俾自己食嘅女人,而一個女人又搵到佢煮乜都肯食嘅男人,呢件事係幾咁幸福!難怪全場都係咁起哄叫佢哋快啲註冊結婚!

「結婚!結婚!結婚!」

節目最後搞到翠如喊咁口,今日終「有情人終成眷屬」,聽到佢哋嘅好消息,真心登佢哋高興呀!