萬千星輝頒獎典禮2022｜細數7大尷尬位 最佳衣著被批油膩 三哥大爆內幕
TVB無晒人？周奕瑋主持全個SHOW
去年11月舉行的台慶大會司儀陣容鼎盛，史無前例由汪明荃、陳貝兒、陳百祥、鄧梓峰等20位星級主持組成龐大司儀陣容。今次《萬千星輝頒獎典禮2022》就只有周奕瑋一個主持，雖然周奕瑋名氣不大，主持大型節目的經驗亦不算多，但依然能夠毫無甩漏咁撐住場面，成功hold成個大局！
最佳衣著陳山聰被批油膩
《萬千星輝頒獎典禮2022》藝人齊齊盛裝出席行紅地氈，除咗會頒發劇集獎之外，仲會頒發最佳衣著藝人獎。最佳衣著男藝人由陳山聰獲得，陳山聰仲笑言多謝自己呢30幾年不斷去買衫。不過陳山聰就被網民批佢著得好油膩，白色西裝配桃紅色花，「牛郎感」超重。
獎門人自己頒俾自己
今年「最佳綜藝節目」由《開心無敵獎門人》奪獎，獎老錢嘉樂、阮兆祥都有上台領獎，相反節目的核心人物「獎門人」曾志偉未知是否為了身份問題，一度不願上台，要等錢嘉樂請先肯上，在上台後亦避嫌不發言。網民亦笑言因為曾志偉現為TVB高層的關係，好似自己頒俾頒自己咁，如果要佢講感言，係咪要多謝曾生？！
《萬千星輝賀台慶》都有得攞獎？
今年最騎呢位絕對是《萬千星輝賀台慶》獲封「最佳年度及特備節目」一事，不少網民一聽賽果都大跌眼鏡，紛紛留言：「可唔可以每一年頒返俾上年頒獎禮」、「今次真係自己頒俾自己」、「台慶頒個獎俾台慶」。
不斷讀錯「萬千星輝頒獎典禮2002」
今次頒獎典禮有不少曾經擔任過經典角色的星級嘉賓到場頒獎，可是未知是否因為《萬千星輝頒獎典禮2022》的名字太繑口，鄭則仕、吳啟華、湯寶如等人都口誤講成「萬千星輝頒獎典禮2002」，無論係嘉賓定頒獎典禮個名都成功穿越到2002年！有網民就猜測應該係公布頒獎紙上設計有誤或入錯資料，先搞到跟稿讀錯晒。
江美儀拎視后 三哥大爆而家好公平
《最佳女主角》由《下流上車族》女主角江美儀拎到。江美儀拎獎時仲話以為唔係「TVB親生女」的佢唔可以拎獎，頒獎的三哥即補充「而家唔同架啦，好公道架，高層係度呀嘛。」
林敏聰再9upper上身 寸江美儀係「烏雞」
今年失落視帝的林敏驄一直沒有機會上台亂講嘢，終於到最後《下流上車族》獲得「最佳劇集獎」的時候，先有機會上台講幾句。林敏驄即爭取機會字字珠磯，妙語連珠。一開波就宣傳自己在3月即將舉行的演唱會，話「個人榮辱好小事，識拎一定拎終極大獎」。先寸問係咪要多謝曾姐，話之前想多謝佢，點知俾佢打咗2巴，又話多謝總經理，指同曾志偉一齊做嘢咁多年，佢都無對佢好過，不過原來佢係最好的朋友。之後又笑江美儀一身黑色晚裝似「烏雞」，仲要話勇奪視后的江美儀在事前食咗多顆「事後丸」玩食字gag，笑爆全場！林敏驄經常一啖砂糖一啖屎 ，搞到網民都話睇到好緊張，唔知林敏驄幾時爆大獲「睇林敏驄講野睇到心驚膽顫」「世界上有邊個食得住佢」「新聞都播唔切」
