東張西望｜苦主請工人受騙網民錯重點：咁高質以為苦主係主持人！

Sep 28 2022

《東張西望》近年為各界苦主伸張正義，算係TVB節目中備受網民一致好評的節目之一。早前有苦主爆過一單係有關外傭中介公司的問題，俾晒錢但2年都無工人出現，而昨日（27日）最新一集再有苦主被同一間外傭中介公司欺騙，今次人就有，但就完全「貨不對版」。網民關心事件之餘，錯重點留意到今集苦主外型都相當高質，仲話「以為佢先係主持人」

苦主被外傭中介公司呃

昨日（27日）最新一集《東張西望》有苦主投訴被外傭中介公司欺騙，而呢間公司同早前俾晒錢但無人影係同一間中介公司。苦主指佢想請個工人，就搵咗呢間中介公司，而對工人的要求只有2樣要求，第一就係要識講中文，其次就係要識煮中菜，其原因因為佢屋企有小朋友。中介公司就介紹咗一個曾經喺台灣做過工人的姐姐俾佢，仲話曾經照顧過3歲小朋友，識講中文，識煮中菜，仲識講笑話唔食豬都識煮豬肉，苦主同佢視像面試時，工人姐姐都可以同佢用普通話溝通，簡直係完美符合苦主要求！苦主就即刻想請該姐姐嚟港，特登俾多千5機票同埋額外隔離酒店所需的費用，加加埋埋俾多咗成2萬幾。

工人姐姐「貨不對版」

點知一嚟到完全「貨不對版」，苦主表示唔好話溝通，該姐姐係完全唔識廣東話同埋普通話，根本係聽唔明，淨係識講一句「我不懂」，而所謂識煮中菜，除咗印尼撈麵之外無嘢識煮，然後連打邊爐都唔識處理，但明明中介公司話佢喺台灣做過工人，但姐姐就表示佢從來都無見過邊爐。苦主就質疑面試時應該係有人喺旁邊做翻譯，中介公司就回應話唔係母語，可能學得慢同埋話影片中工人都真係講好，表示間間中介都係咁做，工人姐姐做成點係唔關佢哋事。