東張西望︳梁敏巧追訪屯門大媽大叔激動護花出手：你實無命！

Jan 10 2024

東張西望｜「屯門娜娜」因為喺屯門公園唱歌，與Happy 伯「互動」有趣而成為網絡紅人，一早唱出屯門，入埋TVB參加過《中年好聲音》。而原來呢種屯門公園唱歌表演無因為娜娜的離開而斷咗，《東張西望》近日收到居民報料，原來屯門中山公園一帶又有「大媽姣聲音」日夜轟炸，吸引100名左右的阿叔阿伯到場支持之餘，除咗唱歌，呢班大媽仲會同阿叔有「異常」的親密接觸！女主持梁敏巧追訪屯門大媽，結果惹來大叔出手護花，仲攻擊攝製，最後流血收場更要報警處理。

梁敏巧馬拉松式追訪屯門大媽　其中一位「服務員」大爆「摸摸看」內幕！

早前提到屯門中山公園有10-20名大媽日日開檔唱歌，吸引近百名叔伯到場聽歌之餘，更會當眾拖手、坐大腿、甚至頭貼頭，行為親密。噪音問題影響街坊日常生活，甚至帶著小朋友都不敢經過天橋，以免「學壞」。而《東張》攝製隊深入大媽內部追訪時，巧遇警方接到投訴到場清場，大媽和一眾叔伯即時「機都唔收」嚇到雞飛狗走，四散到公園附近範圍。當時有警方透露「呢班人日日喺到載歌載舞，搞到污糟邋塌，日日都要過嚟服侍佢哋⋯⋯我哋接投訴係噪音，其他無理」。

眼見身穿紅衣、短裙、黑絲的大媽四散，梁敏巧即同攝製隊周圍「尋人」，親身同一眾大媽做訪問，了解她們的心路歷程。唯梁敏巧一路問，一路食檸檬，有大媽避而不談，與梁敏巧展開馬拉松式奔跑比賽，躲入洗手間；有大媽即抵受不了梁敏巧不停追問，而開聲稱「呢啲嘢你唔使問我啦小姐」；而紅衣大媽更趣緻，逃跑時有一眾大叔如保鑣般陪同，當看到東張女神趕至時隨即起哄，稱「嘩，《東張西望》啊，今日換咗第二個女神」。看到女神，這班大叔隨即變心，叫大媽「你講兩句啦」。

一眾大媽拒表態，卻突然有位日日在大媽開檔時負責招呼大叔、老伯的姐姐自動請纓，爆大鑊！她指「我哋都係娛樂長者同啲退休人士，佢哋無嘢做嚟聽唱歌；有摸手仔腳仔，嗰啲收幾百蚊，幾千蚊都有；攬攬錫錫都有啦，上埋床都有」。

中年大叔勇敢「救大媽」　出言恐嚇兼出手傷人！

而拍攝期間，突然有位黑衫大叔獨自行近攝製隊，更惡形惡相般恐嚇梁敏巧及攝製隊。一來他便大叫「你唔收機一定無命」，隨後更指「我已經影咗你相啦」、「影晒你哋啦小姐」、「差人走咗啦，人哋（大媽）走咗就算啦」。講講吓，大叔突然火燒心，如葉問上身般伸出魔爪爪向梁敏巧身前的攝影師位置，打鏡頭之餘疑似搶機，當時梁敏巧即大叫「嘩！嘩！嘩！報警」。大叔還未收手，更一手推開在場攝製組人員，攝製組即呼喝阻止並表示「報咗警，你咪走」。大叔聽罷，又再次伸出魔爪摵人，爪傷其中一名工作人員。