《愛回家》︳炎明熹驚現「做返自己」 外星演技令觀眾難忘

炎明熹演返自己

繼After Class的姚焯菲Chantel昨晚已出發到新西蘭升學之後，同團另一成員炎明熹Gigi都透露有意於內地升學，不過Gi炎粉不用失望，Gigi在港大把工作在身，昨晚佢客串演出《愛回家》，做返自己，自言由小學開始已經係《愛回家》捧場客，對首度獲邀參與演出，坦言非常興奮：「我一路都有追開，佢哋嘅內容令我睇完之後好開心，每集又會帶出一啲信息，好生活化。呢個處境劇我由細睇到大，小學時係《八時入席》，後尾又有唔同系列。」

Gigi自帶「火星演技」入劇 網民：多倍尷尬

劇情講到大小姐的兒子Philip仔（梁禹勤飾演）成為咗Gigi的粉絲，同技蘭一齊追星，點知就被大小姐誤會成Philip仔同技蘭拍拖，出招阻止。Gigi喺劇中對白唔多，只有單單幾句，最後更獻唱一曲《好想約你》結尾。不過單單幾句對白的演出，就令觀眾「非常難忘」，本來Gigi就指自己係火星人，講嘢一向走搞笑風，估唔到Gigi真係做自己，就連「火星演技」都帶埋入劇，有網民指因為咁呢集《愛回家》劇情尷尬感上升「愛回家啲劇情本身已經拍得尷尬，再加上炎明熹啲本色低能演出，真係多倍尷尬」

曝光性感簽名相

其次，仲被網民捕捉到Philip仔搵Gigi簽名的相係Gigi一張罕有性感的照片，更大讚Philip仔識貨。原來呢張相係gigi ig都有po過，係節目《聲生不息》中演唱《眉飛色舞》時的造型。

同「根叔」劉丹合照圓夢

Gigi指可以同劇中角色真正合作，感覺既榮幸又夢幻：「真係不可思議，冇諗過以前甚至依家仲一直睇緊嘅劇，會有機會遇到佢哋。」自言最尊敬角色「根叔」劉丹的Gigi，非常希望有機會同根叔合照：「我知佢做咗好耐，好開心可以加入呢個大家庭，因為我見到佢哋好似屋企人咁相處，又會互相叫對方阿爸、家姐或者阿妹，然後佢哋亦都好照顧我。」Gigi今次參與演出之後，仲大讚劇中道具相當逼真：「我一直以為新威龍廣場係一個真嘅廣場，然後Key個名落去，後來先知原來係一個廠景。」

炎明熹想多拍劇：好有趣

Gigi話希望日後可以再多點拍劇，因為非常鍾意同幕後工作人員相處，Gigi話：「我一直好想拍劇，我覺得拍劇好有趣，我好鍾意同工作人員相處，佢哋真係非常之好，好似屋企人咁，所以我希望儲多啲經驗同能力後再拍劇。」講說話充滿童真嘅Gigi，笑說拍攝當日遇到兩名相當可愛嘅小朋友，還送上兩粒朱古力氹小朋友開心，佢興奮咁話：「嗰日誤打誤撞帶咗兩粒朱古力，其實原本我係想試吓個味，因為冇食過，最後我就一人一粒請佢哋食，啱啱好，Yeah！」