全民造星5︱王君馨過檔ViuTV做評審網民反應兩極：想要返Edward伍姑娘陳詠燊

全民造星5︳王君馨過檔ViuTV做《全民造星5》評審

前年正式離巢TVB的王君馨近年搞作多多，又上內地跳舞選秀節目，又出新歌圓歌手夢，近日仲過檔以評審身份上ViuTV《全民造星5》。第一次做《造星5》評審嘅王君馨講嘢非常客氣，就算紅組學員唱到走曬音，王君馨依然給予鼓勵，話自己睇得好投入。

全民造星5︳網民反應兩極：難脫大台味！

唔少網民都驚訝王君馨會出現於ViuTV，亦有網民質疑王君馨做評審嘅資格：「其實我唔明佢有咩資格做評判!?」、「隨時仲差過啲參加者」、「她唱歌也未能勝任，怎做評判」等。不過有網民就為王君馨平反，表示王君馨多年前已經在TVB《舞動奇跡》奪冠，又上過內地跳舞選秀節目《了不起舞社》，絕對有資格勝任評審一職。同時亦有網民狠批佢雖然已經離巢兩年幾，但依然難脫大台味。

全民造星5︳網民：五個評判返屋企啦

唔少網民對於今次評判的評語似乎都唔多受落，就連節目中的導師有時都覺得唔合理「Jay Fung 講得啱，評判啲評語真係R 哂頭」「依家rosa都x啲評判唔識評」仲表示好掛住之前3位評判「五個評判返屋企啦Edward伍姑娘陳詠燊 We miss you!!」除此之外，Jay fung同Rosa都特別令網民鍾意「好中意jf同Rosa講野既方式，令人好舒服，冇咁大壓力，雖然節目嚟講就會悶啲，但現實會想同佢地做朋友」「Jayfung 好好」「JF 好似爸爸」「聽JayFung 同Rosa 講中文好好笑」「Jf好適合做神父 」「Jay fung真係天使」「Jf好溫柔」

全民造星5︳王君馨親選小鮮肉為演唱會伴舞 疑劇透《造星5》賽果？

今次上《全民造星5》除咗做評審之外，王君馨仲睇中大熱1號王鋒及18號Owen賴天恩，邀請兩位上自己首個個人演唱會擔任嘉賓。王君馨Grace將於06/08喺旺角麥花臣場館舉行首個個人演唱會《Light It Up G.Racie王君馨 1st Concert》，日前三人齊齊為演唱會作綵排，王君馨仲大讚兩人比參賽時進步咗好多！不過有網民就好奇點解王鋒同Owen兩人有時間綵排做嘉賓，懷疑王君馨是否劇透，暗示兩人已經淘汰。

王君馨為完夢 延遲生B計劃

王君馨首個個人演唱會，直言感到好大壓力，今次邀請咗七位排舞師為今次演唱會排舞，佢仲首次公開獻唱未派台新歌《fly me to you》，王君馨話首歌係紀錄佢同丈夫遠距離戀愛的溫馨甜蜜，佢亦有即席同排舞師及現場觀眾跳舞擺甫士玩遊戲。

王君馨早前受訪時說：「之前老公等咗6年唔生小朋友住，我同老公講叫佢等多兩年，我想生咗唱歌事業呢個小朋友先，嚟緊就要進行地獄式訓練，減肥keep fit兼做運動練氣。」王君馨喺訪問中透露，話自己四歲嘅時候已經夢想表演唱歌，終於等到今年開個人演唱會，非常感動。

王君馨拍抖音拍出事 內地網民唔滿意

王君馨前年離巢後，就北上參加女子跳舞真人騷《了不起舞社》，進軍內地市場。王君馨去年亦開設抖音賬號，以短短一年時間就吸引到20萬粉絲。不過王君馨早前就拍抖音拍出事，當時王君馨以抖音潮流以「我是xx（地名）的」為文案，介紹自己家鄉。雖然佢已經以「我叫王君馨，中國香港的」做開頭，但依然令內地網民感到非常不滿，認為佢太過刻意提及「中國香港」！