父親節最後衝刺！6大話題茶樓 週末最潮熱點
新潮點心進駐The ONE
尖沙咀新派點心店，環境裝修新潮，純白主色配上紅色心心，舒適簡潔，令人眼前一亮。點心即叫即做，材料選取有機食材，重加入素食餐單，同老豆食嘢都可以又潮又健康。品牌重會每月推出全新時令主題系列，定時同其他品牌做crossover 產品，到時梗係買埋俾爸爸啦。
舊屋邨新點心
元朗新開張點心店，最特別係整間店嘅懷舊布置，由大環境到小裝飾都做到足，可以話係1個小型博物館。食客抬頭就見到牆身裝修到好似個舊式屋邨咁，勁有細個屋邨走廊feel。食物當中以古法千層糕最有特色，做法少有，一定要試。
貴氣豪裝做大爺
喺中環嘅大官廳，走貴氣路線。食材高級，菜式刁鑽，叉燒都要用到匈牙利攣毛豬，全港罕見。環境堪稱一絕，每層不同主題，富麗堂皇定簡約鮮明嘅環境任你揀。食到下午，你重可以同爸爸喺樓下嘅復古格調酒吧，飲返杯中式style嘅調酒，兩父子談下心。
大官廳
地址：中環威靈頓街74號明發大廈地下至2樓
電話：3125 3228
營業時間：11:30am-3:00pm；6:00pm-11:30pm
米芝蓮二星中菜
想同爸爸豪過父親節？咁首先你要同佢去飲餐超級勁嘅茶先！身為米芝蓮二星嘅香宮中菜廳，無論菜式賣相、點心用料都相當刁鑽，加上主廚嘅功力，創作咗好多獨有嘅點心，例如三色梅花餃、海膽珊瑚餃、京蔥秘醬焗鴨酥。款款都靚爆鏡，小心媽媽會搶晒嚟影相，同時呷醋。
香宮
地址：尖沙咀麼地道64號九龍香格里拉大酒店地下1層
電話：2733 8754
點心供應時間：12:00nn-3:00pm（星期一至六），10:30am-3:00pm（星期日和公眾假期）
內容延讀：
>食飽睇下地上最型嘅星爸
>食完梗係帶埋爸爸買潮物啦
深夜食堂飲茶必到
夜媽媽爸爸想飲茶食包做宵夜？嚟土瓜灣區嘅深夜食堂首府。選擇大路，但整體水準做得好，係一種舊式味道，價錢親民。蝦餃同燒賣係穩膽，而馬拉糕則最有驚喜。夜媽媽嚟到，都可以叫碗老火湯，味道自然，暖入心窩。
慶發飯店
地址：土瓜灣譚公道102-106號嘉運閣地下
營業時間：7:00pm-3:00am
殿堂級茶樓
稱得上經典茶樓，全港首推蓮香樓應該都無人異議。茶樓內重有姐姐推點心叫賣，非常難得。不過孝子們記得提早少少（其實係一早）霸位，因為茶客多如雲，等埋發叔嚟到怕且都食唔到。
