懷舊扒房

土地問題鋸個扒都難?扮文青去全港12間懷舊扒房

飲食

廣告

《我的少女時代》帶住《那些年》嘅影子,校園純愛、凡人愛上男神女神,定必激起大家嘅少女/少男情懷,緬懷一下必成指定動作。而剛剛因王家衞電影《花樣年華》同《2046》取景地點金雀餐廳結業,係咪因為土地問題呀又?再加懷舊扒房係唔少嗰個年代嘅少男少女約會首選地點,我可以肯定,絕對會戚起大家衝去食港式鼓油西餐條筋,呢個大家唔單止係你阿爸阿媽阿爺阿嫲,重包括你。而家嘅年青人都愛耍文藝,有邊個唔想感受下又藝術又浪漫嘅周慕雲同蘇麗珍戀情?

text-mandyman photo-網上圖片

懷舊扒房 有得食好去食啦,望!

要做文青去扒房影啲王家衛式嘅相,tune色之外,梗係要有埋個幫到手嘅扒房場景。賣港式鼓油西餐嘅扒房係上世紀70年代產物,當年極之盛行,至今仍有唔 少扒房屹立。經歷數十載,唔少餐廳最後都不敵天價租金、收樓清拆等現代問題,執下一間執下又一間,唔通我哋想鋸個平靚正嘅扒都咁難?其實港九新界都重有扒 房為大家效力,我哋一於list晒出嚟,無論你去到邊區都可以浪漫地鋸個扒。如果嫌棄鬆肉粉牛扒,請你返去高檔扒房食幾百蚊塊嘅扒,呢度只講人情味同懷舊 氣息,價錢同連鎖快餐店相若,不過情懷無價。

港島懷舊扒房,鋸啦你!

1.樂意扒房(灣仔) 將於2016年結業

老店結業,通常都係關門大吉前幾日先宣告,大家未必趕得切去見佢最後一面。喺灣仔42年嘅樂意扒房,卻早早就通知大家,佢喺2016年因馬來西亞領事館拆 卸而講bye bye喇!既然有時間,大家不妨準備個懷舊style,襯番店內嘅仿紅磚牆、紅色格仔布、懷舊卡座,邊鋸頂級美國Prime grade牛扒,邊影輯最有《花樣年華》feel嘅相,啲like唔使呃都勁多。

地址︰灣仔告士打道50號馬來西亞大廈
電話︰2529 8933

2.波士頓餐廳(灣仔)
唔知大家有冇食過火焰牛扒?1966年開業嘅波士頓餐廳,唔單止首創火焰牛柳,燒到火熊熊嘅視覺震撼,當然睇到大家呆晒。而70年代興起用鐵板嘅熱潮,都係由佢帶起,既然係原祖級,梗係唔可以錯過。大家一於去朝聖啦!

地址︰灣仔盧押道3號地下
電話︰2527 7646

 

3.森美餐廳(西環)
西環喺上年開始逐漸變臉,愈來愈「堅離地城」,前排就連喺西環三十幾年嘅森美餐廳巨型牛牛招牌都要被拆。招牌雖然被熄燈,不過餐廳內昏黃燈光仍然溫暖,叫個森美汁牛柳就最fit。港式豉油西餐就係要淋個汁,有別於外國嘅做法,而呢個森美汁係自家配方,香濃惹味,必點。

地址︰西環皇后大道西204-206號
電話︰2548 8400

九龍懷舊扒房,食啦你!

4.飛鷹餐廳(深水埗)
咁多間扒房,飛鷹呢個就最有霸氣,而佢個拳頭咁大嘅特製提子餐包同樣霸氣十足,小編食咗個包已經覺飽,真係令人印象深刻。原來飛鷹係1977年由澳門來港,屹立喺舊區深水埗,坦白講,呢個地理環境,真係令人好擔心佢隨時會因拆卸重建等影響而結業。

地址︰深水埗荔枝角道256號
電話︰2395 2576

5.哥登堡餐廳(土瓜灣)
一睇門面招牌字體同埋掛出嚟嘅霓虹燈招牌,就知哥登堡有番咁上下歷史。雖然佢全盛時期有4間分店,而家只剩1間總店,亦冇格仔檯布,但有梳化卡座,同暗暗燈光,懷舊味道仍在,街坊們就卻嘅可以去下。

地址︰土瓜灣馬頭圍道440號
電話︰2715 1639

6.大興餐廳(第尾牛扒) (旺角)
可能因為身在年青人蒲點嘅旺角,1973年開業嘅大興餐廳(第尾牛扒)相對較多後生仔女認識同幫襯,就腳真係好緊要。

地址︰旺角西洋菜南街218-220號1樓
電話︰2380 3938

 

7.愛群餐廳(長沙灣)
愛群餐廳名氣雖然唔大,不過已喺長沙灣超過30年,喺深水埗區長大嘅都會識佢。

地址︰長沙灣青山道177-179號地下
電話︰2361 6717

 

8.金鳳大餐廳(太子)
金鳳嘅蒜蓉牛扒有冇令你口臭過尷尬過?有46年歷史嘅金鳳大餐廳,以平價鐵板餐作招徠,今年更喺九龍城開新店,計埋太子總店、灣仔同尖沙咀,有4間分店,都算巴閉。太子總店最有舊式味道,亦因為咁,唯獨佢會有人龍喺門外等候,所以要食,都係會去返太子店。

地址︰太子荔枝角道102號地下
電話︰2393 6054

9.美而廉餐廳(旺角)
你阿爸阿媽可能就係喺美而廉第1次拖手仔。早幾年因結業而再度爆場嘅美而廉,結業後年幾重開,新店當然冇爆場,唔使我講點解,大家都知係因為食情懷,而唔係為件扒。

地址︰旺角塘尾道51號地下
電話︰2658 5599

新界懷舊扒房,去啦你!

10.蘇珊娜餐廳(西貢)
以前去西貢,見有兩間蘇珊娜,店面亦非常相似,唔知頭唔知路都唔知揀入邊間好,不過而家唔使揀,幾年前萬年街嗰間已結業,只剩普通道1間。

地址︰西貢普通道76號
電話︰2792 7163

11.莎樂美餐廳(荃灣)
終於講到小編住嘅荃灣區,莎樂美經營廿多年,喺區內好有名氣,上下兩層,環境昏暗又逼,而條樓梯就成為排隊嘅地方。雖然早幾年喺附近開多間分店,舊店人潮依舊,因為要食鐵板餐係食氣氛嘛,識去梗係去本店啦!

地址︰荃灣沙咀道294號地下
電話︰2492 5021


12.安娜餐廳(元朗)
懷舊扒房繼續喺返舊區搵,元朗就有間安娜,喺區內嘅平民扒房,三十幾年嚟經常爆場,少不免要搭檯鋸扒,要玩浪漫就唔好諗呢度喇!

地址︰元朗仁樂坊5號地下
電話︰2479 5885

YOU MAY ALSO LIKE ...

There are 2 comments

Add yours

Comments are closed.