【Kobe】旅行要夠Rational 教你應使則使
以前讀書時有個理論叫「Rational Choice Theory」，一學愛上，理論大概是指透過分析、比較各選擇的利益與效用，對較高者有偏好，並作為行為依據。其實，簡單點來說，即是應選擇性價比高的東西，再再簡單點來說，即是「應使則使」。
我試過同一時期與另一位朋友去差不多的行程，進行差不多的活動，使費卻比對方少近半。其實，不是我特別慳，而是「精明遊」確有竅妙，「識搵特價」及「識煮嘢」好重要。
去旅行使費不外乎機票、住宿、膳食及玩。要搵平機票？太多渠道了，就不說。至於住宿就要看地方，例如東南亞價廉物美，當然住靚酒店，性價比高嘛﹗物價高的地方就可以選Airbnb或Homestay，最好有廚房，可以自己整嘢食。如果一定要訂酒店，可以集中用1、2個網來訂酒店，令自己成為特定會員。因為不少酒店網只給熟客特價，我向來用B字頭酒店網訂房，已成為Genius會員，雖然牌面價未必最平，但計上特選會員優惠有時可以平好多。
膳食方面，作為廚娘，外遊時「自煮」不成問題，有時更非常享受，因為能用當地最新鮮的食材過過手癮，啟發性相當大，但唔使下下使出真功夫。去東南亞、日韓，我一定唔會煮，因為外面太多好嘢食，無謂嘥quota。但如果一般西餐，自己煮與出外食分別不太大，我就建議自己整，起碼睇到食材新唔新鮮。所謂靠山食山、靠海食海，要煮就煮當地最盛產的食物。
之前去挪威，超市買4大塊三文魚柳，折合只約50港元，加埋沙律及湯兩個人唔使100港元，重要好食，真係物超所值，如果出外食差不多的東西起碼貴5、6倍。又例如，我在香港經常唔捨得用靚牛肉整Burger，覺得整免治有點浪費，但去到新西蘭就可以豪買牛肉，即使不是買最貴的牛已經好好食，結果我整到自己歷來最滿意的Burger，呢種就叫Rational。
「玩」方面亦有少少tips，如果計劃好行程，建議不妨上網搜尋一下有冇好嘢。例如要去新西蘭跳降傘，可先在網上搜尋「Skydive New Zealand special offer」，結果俾我搵到當地團購網做特價，跳傘連相及影片，每人平成千幾港元，約原價6至7折。平不是重點，重點是覺得自己好醒，真係開心到一路跳、一路笑。不過，呢種玩法只適用於行程計劃周詳的人，否則跟唔上行程可能要倒蝕。
用當地團購訂跳降傘，每人平成千幾蚊，夠俾兩晚酒店錢。
text-Kobe Wong
曾任職財經傳媒十多年
主理嘗滿‧SatisFactory私房菜兩年多
熱愛烹飪、熱愛旅遊、熱愛分享生活
識煮幾味又愛去旅行，同大家大雜燴分享一下
內容延讀：
