1群大學生、 2隻腳、8間大學、45公里

Blogger

廣告

【女生專屬byT.LUM】photo- Benjamin @ University Nike Icon

人哋話大學必做5件事,我大學時代就只喜歡做我鍾意嘅事。由於係運動員同校隊背景,加上鍾意搞活動做市場推廣,所以當年嘅我就參選「UNIVERSITY NIKE ICON」(UNI),1個集合咗我兩個喜好嘅實習計劃。介紹返,UNI並非只係推廣品牌同產品,而係將大學生嘅想法同創意喺學園實踐出來,推廣運動風氣同建立屬於大學生嘅運動文化。

點解介紹番?因為上星期日我參加咗UNI師弟妹舉行嘅1件好青春、好熱血之UNI RELAY 2015。概念源自用雙腳跑過8間大學,用運動將大學之間連接起來,全場45公里,參加者可以跑足全程,又或者用接力形式完成某段路程。

由樹仁大學跑到香港大學,可惜跑唔到過海,所以由香港大學搭車到理工大學,再跑過公開大學

、城市大學、浸會大學、科技大學,最後到中文大學。我認為呢種事可以一生人瘋狂1次。

瘋狂嘅係……1日跑過香港九龍新界。

瘋狂嘅係……未試過1日跑多過40公里。

青春嘅係……一班人有車唔搭,而走去跑過8間大學。

青春嘅係……同一班年輕人跑步嘅感覺。

難得嘅係……原來有好多間大學我都未去過。

難得嘅係……有好多年輕人都好有毅力。

變態嘅係……去科技大學條斜路真係好攞命,上斜落斜好似過山車。

變態嘅係……梅子林係好多梯級,但為留倩影,大家可以去到好盡。

完成所有路程,參加者之間嘅友誼好似更進一大步。

完成所有路程,雖然好攰好攰,但內心卻好滾動 !!!

跑步,係用兩隻腳,亦永遠係喺路上面跑,但其實用唔同方法去跑,換個心態去跑,你嘅感受亦會

唔一樣。今次係我1日跑得最多嘅1次,而呢種事情一生人亦要青春1次。

T.LUM’sProfile
1個鍾意做運動嘅女生。做運動好簡單,只要鍾意嘅、喜歡嘅、想試想做嘅,就可以行動。