韓謎日誌-食盡至靚海鲜篇
1.醬蟹 【게장】
醬蟹係我呢世女最鍾意食嘅菜式，重只有韓國先食到（如果香港有嘅話我堅唔敢食）。醬蟹做法係先將海螃蟹醃喺醬油裏後去殼，切成一半，再放佐料，過1日左右再食（不過網上都有話要重複數次，過3日再食）。Anyway，口感有啲似上海嘅醉蟹，但冇酒味，新鮮嘅蟹肉同蟹膏浸喺秘製嘅醬油裏面，竟出奇地鮮甜同唔腥！食完真係會齒頰留香㗎！
要講到口中高潮（大家唔好心邪呀），就係將蟹蓋入面滿滿嘅蟹膏，撈埋熱辣辣嘅白飯食，嗰種感受我只可以用paradise嚟形容。
醬蟹其實冇分季節嘅（據我所知），總之一年四季我都食到啦！重有，你以為剩係生蟹會唔飽咩？咁你就大錯特錯喇！因為佢哋會成set前菜上，重有我細妹好鍾意食嘅蒸雞蛋，包你食到眼坦坦！
2.鷺梁津魚市場 【노량진 수산시장】
呢個地方係每個到韓國嘅遊客必到嘅地方，因為魚市場有好多千奇百怪嘅海產，可以食到好似羅茲威爾咁大嘅鱈場蟹、龍蝦、鮑魚等等。重有鷺梁津水產批發市場大樓好易認，從地鐵車廂裏面走出嚟就望到，跟住地鐵站相連嘅天橋行，進入大樓落1層樓就係令人眼花撩亂嘅魚市場，種類繁多嘅生猛海鮮近在咫尺。樓上設有多家餐廳，可以滿足你哋食慾之餘，亦滿足到你周圍格價以及同店主議價成功後嘅滿足感！
提示：一定要講價，因為佢哋見遊客一定開高3、4倍，所以精明嘅你，最好搵多幾個夠牙力同食力嘅朋友，因為可以係咁劈價同嗌多啲唔同款式，就唔怕食唔晒啦！
另外，駐場有唔少可以講普通話嘅阿朱媽，當你揀好晒食材後，佢哋就會帶你上2樓嘅熟食店煮嚟食，當然你唔好諗到好似香港西貢、鯉魚門咁多樣煮法。韓國人處理海鮮只有蒸、烚、滾湯或者生食㗎咋！鮮味搭夠就係原始啲㗎喇～
推介菜式：鱈場蟹、鱈場蟹炒飯、辣魚鍋、中蝦、螄蚶
每人消費：約5萬韓圓（晚餐）
首爾市銅雀區鷺梁津洞13-8號
地鐵1號線136鷺梁津站，站外有天橋連接
3.海鮮鍋【해물찜】
講到食海鮮鍋，一定要去江南區新論峴，因為呢條係首爾數一數二嘅食街，有唔同特色嘅餐館及居酒屋，所以江南區嘅上班族一放工，就會三五成群喺呢度食飯兼飲番幾杯，吐下苦水，因為喺首爾工作壓力相當大。佢哋鍾意BBQ或蒸蛤蜊，特別適合當啤酒或soju嘅下酒菜。
蒸海鮮通常用煲一路滾，本身已經先煮好，所以一埋檯點火就食得，味道鮮甜，食到咁上下，你重可以order麵條放落去，啲麵身索晒啲湯汁，你直頭想成個煲都食埋落肚！
而我最buy嘅就係佢嘅烤海貝，大大隻扇貝喺烤爐上燃燒，湯汁喺貝殻中滾動，喺貝上加添啲辣醬汁同邪惡芝士、彈牙嘅魷魚先生…我直頭一路寫一路呑緊口水呀！另外BBQ dinner set重送上我最愛嘅辣炒年糕同番薯，埋單4個人先係84,000 won，即570港幣，唔怪得我死黨話喺韓國食嘢唔使睇價錢啦！！！
首爾特別市江南區論峴洞163-5 沙灘的珍珠 3號店
주소: 서울시 강남구 논현동 163-5, 갯벌의진주 3호점
전화번호: 02-544-8862
下期會繼續介紹韓國本土美食，想知道邊度食得最串？千祈唔好錯過呀！
text-Pink
Pink (핑크)
韓妝達人，本來過着刻板OL生活，自小愛扮靚，更鍾意韓國潮流文化，幾年前隻身遠赴韓國學藝，在江南著名化妝學府Atelier Makeup Academy實習，曾參與過無數韓國fashion shows的化妝實戰，亦試過為韓國小姐化妝。回流香港後，創辦Pink Evolution化妝學校，教授地道韓式化妝，又代理韓國化妝及護膚品牌。Pink長期港、韓兩邊飛，極為熟悉韓國地道及最新的潮流文化，連本土韓國朋 友亦為之驚歎！
詳情可瀏覽本人facebook 專頁PinkEvolution
《Instagram》 : PINKEVOLUTION
