韓謎日誌-韓國地道BBQ篇
我並唔係咩食評專家，但始終對食有一定嘅要求，喺韓國食燒牛，咁就梗係食韓牛啦！話晒啲牛係自家牧場養殖，肉質特別鮮嫰，又唔會出口，所以飛親嚟都一定要食番夠皮。睇見每塊牛肉上面完美嘅雪花紋，未食已經呑定口水喇！再將佢放上烤網上面燒，如果嫌太膩，可以將牛肉包埋生菜及紫蘇葉一齊食，咁就啱啱好喇！
唔講唔知，原來傳統上，韓男見未來岳母大人，會買韓牛作見面禮，以表尊敬，而韓牛通常喺大時大節，有慶典嘅時候，先會攞出嚟大家一齊食。加上牛肉價錢普遍比較貴，而且佢哋平均收入冇香港人咁高，所以平時食飯，韓國人甚少order 牛肉，有五花腩（삼겹살）已經算唔錯，所以當我啲港燦朋友每次嚟韓，都點到成檯都係韓牛嘅時候，嗰刻我嘅感覺好似喺蘭桂坊落club，啲土豪或者富2代喺張檯度開晒幾十支Dom咁，個氣場令到全間食店嘅韓國人向我哋投以奇特嘅目光…
另外，韓國人都好鍾意燒喜羊羊，有好多好似新疆嘅賣羊肉串嘅鋪頭，而我就麻麻哋羊肉串嗰浸香料味，我比較喜歡冇醃過嘅羊肉。而呢間羊肉店出名夠晒新鮮，羊肉鮮嫩唔膻兼有啲似牛味，重有老闆娘自製嘅羊肉腸，烤熟咗，羊腸皮脆肉嫰，只此一家！所以我每次返嚟探社長都會同佢哋嚟呢度開餐，老闆娘知我鍾意食，重會私人醒1碟俾我添㗎！
韓國人公司重有個傳統，叫「會食」【회식】，即公司聚餐，大約每星期1次，公司上上下下員工都要出席，通常同team人放工後就去開餐，食飯、飲酒跟住再去唱K，1晚轉幾個場！聽落好似好爽咁，但係辛苦到嘔，因為通常呢啲聚會都係要擦下老細鞋、拍馬屁當埋堆、陪老細癲完飲到爛醉，第日依然要準時返工，唔可以遲。大部分韓國打工仔平日都要早出晩歸，每日做十幾個鐘等同閒事。所以唔係香港人先有OT㗎！
至於喺韓國我最鍾意食嘅其中1樣嘢就係烤大腸【곱창】，佢哋分別有大腸、小腸同埋盲腸，弘益大學附近有條街，成條街都係烤腸專門店，其中有1間係芝士烤腸，大腸小腸放喺塊鐵板度，然後面頭鋪滿晒芝士，好似食緊pizza咁，勁誇張！另1種就好似雜錦鍋，每邊放咗唔同味道嘅炒大腸，例如大蔥炒同辣醬炒大腸，重有我至愛嘅炒年糕。最尾你重可以加多底炒飯上面，就算大食到好似小林尊咁都要認輸！當然呢種咁邪惡嘅食物，久唔久食1次就OK，因為實在太高膽固醇喇！
Pink (핑크)
韓妝達人，本來過着刻板OL生活，自小愛扮靚，更鍾意韓國潮流文化，幾年前隻身遠赴韓國學藝，在江南著名化妝學府Atelier Makeup Academy實習，曾參與過無數韓國fashion shows的化妝實戰，亦試過為韓國小姐化妝。回流香港後，創辦Pink Evolution化妝學校，教授地道韓式化妝，又代理韓國化妝及護膚品牌。Pink長期港、韓兩邊飛，極為熟悉韓國地道及最新的潮流文化，連本土韓國朋 友亦為之驚歎！
詳情可瀏覽本人facebook 專頁PinkEvolution
《Instagram》 : PINKEVOLUTION
