韓國婚禮流行趨勢(上集)

Blogger

廣告

【韓謎日誌by Pink】近年韓風熾熱,就連影婚紗相都興去韓國影,好多人唔明,點解影結婚相都要特登飛去韓國影,而重要係影室內而非戶外?理由好簡單,因為韓國婚紗攝影係影得個人好靚、好有型!好似電視劇裏面啲男女主角咁。而唔係只係影到個景好靚,但個人就好似鼻屎咁大粒咁。

其次係化妝師同髮型師都好專業同細心,會將1對準新郎、新娘打扮到明星咁樣。上期我哋都介紹過啲準新人會喺韓國江南區一帶嘅星級美容院裏面化妝set 頭,基本上喺香港好難有咁嘅待遇,因為香港地方細,租金同人工又貴,冇可能有5、6個staffs同一時間服侍你。喺香港你要有咁嘅待遇,除非你係楊千樺嗰啲級數啦!

再加上韓國嘅婚紗同鞋真係好靚!老實講,佢哋嘅音樂、電視劇咁hit,連帶化妝,同時裝潮流都席捲全球,而婚紗咁常喺電視劇嘅場景出現,冇「奶油」啲港女唔喪跟㗎嘛!邊個唔想自己結婚嗰日好似韓劇女主角咁靚㗎先?

而今次我返「鄉下」做嘢之際,就好有幸拜訪咗有韓國Vera Wang之稱嘅Rosa Sposa(로자스포자)嘅總部,除咗參觀佢哋嘅工作室之外,亦有幸訪問佢哋嘅創作總監 Choi Myung(최명 대표님),分享一下韓國現今及嚟緊流行嘅婚禮及婚紗造型潮流添!Rosa Sposa之所以咁出名,除咗因為佢哋嘅婚紗用料靚之外,亦由於設計獨特及手工細緻,貫徹其高雅氣質路線,所以吸引唔少韓國嘅名人同明星,都指定着佢哋設計嘅婚紗同晚裝。

其中有《Running Man》入面嘅主持人哈哈(하하)同佢太太(별)、《我們結婚了》嘅鄭由美(정유미)、《Super Star》嘅鄭俊英(장준영)及張娜拉(장나라)等等,都係着佢哋嘅婚紗及晚裝,當然重有好多星星着過,你都咪話唔勁!尤其呢個品牌會針對客戶本身嘅身形及氣質,挑選適合閣下嘅婚紗。所以佢哋吸引唔少當地及海外嘅新人慕名去選購。

值得一提嘅係,香港嘅準新娘你哋有福喇!因為Rosa Sposa嘅婚紗同晩裝已經正式登陸香港,你哋可以唔使長途跋涉飛去首爾試身或者俾錢買,而家喺香港婚紗店「Bride and You Hong Kong」已經代理咗,準備小登科嘅你哋,重未有心水揀咩婚紗嘅,就快啲去睇下啦!

下期我會同蔡社長大談今季嘅婚紗潮流趨勢,重會透露韓國而家至hit嘅婚禮形式,緊貼韓風嘅你哋點可以錯過呢?

 

參考網址:

<Rosa Sposa 로자스포자>

Instagram:Rosasposa_choimyung

 

<Bride And You Hong Kong>

Instagram : brideandyouhongkong

Facebook:https://www.facebook.com/brideandyouhongkong

 

<MiAmor Korea Wedding Studio>

Facebook:https://www.facebook.com/miamorkorea

 

text-Pink

Pink (핑크)

韓妝達人,本來過着刻板OL生活,自小愛扮靚,更鍾意韓國潮流文化,幾年前隻身遠赴韓國學藝,在江南著名化妝學府Atelier Makeup Academy實習,曾參與過無數韓國fashion shows的化妝實戰,亦試過為韓國小姐化妝。回流香港後,創辦Pink Evolution化妝學校,教授地道韓式化妝,又代理韓國化妝及護膚品牌。Pink長期港、韓兩邊飛,極為熟悉韓國地道及最新的潮流文化,連本土韓國朋 友亦為之驚歎!

詳情可瀏覽本人facebook 專頁PinkEvolution

《Instagram》 : PINKEVOLUTION

或電郵至[email protected]