女生跑半馬究竟會諗咩?

Blogger

廣告

【女生專屬byT.LUM】

早前嘅馬拉松比賽終於曲終人散,跑手應該喺比賽1至2星期後,無論身體定生活都返回現實,重上軌道。冇跑嘅,永遠唔明白跑手點解喺比賽前1日至比賽後幾日都重上載緊照片同感受。但作為跑手嘅你哋應該好明白,尤其參加全港最多人參加嘅賽事,係何等興奮。不論你跑10公里、半馬或全馬,跑出最好時間、跑出你人生第1個賽事或者只係完成賽事,對跑手而言,已經係十分激動同驕傲。

你哋要明白,跑之前1日,我哋一定要配搭好1套戰衣,配搭好當然要上載去社交網絡,咁做無非係種自我肯定同鼓勵,代表「我已預備好」嘅心態。跑完當日上載相而表達自己興奮心情當然唔少得。跑完後嘅第1日係最肌肉酸痛,好多跑手都不忘表達對「馬拉松比賽翌日假期」嘅訴求。並且,網上會充滿不同跑手標籤或被標籤嘅跑步靚相。而跑完後幾日,跑手必做:上載大會時間,話晒一分一秒都係淚與汗,最最最重要,上載番幾張跑步型照,跑得咁辛苦,有張型相,幾辛苦都值呀!所以你話,1個跑步比賽嘅洗版期係可以為期一週。

講番自己,雖然跑過台北同上海半馬,但香港就從未跑過,所以點都要喺自己嘅家跑番次半馬。1個半馬,21.1公里,跑接近2小時,120分鐘,重複住同樣動作,係好需要堅持同毅力。同時間,喺呢120分鐘,個腦袋、眼睛同耳朵其實都好得閒,因我並非專業運動員,冇超一般人嘅專注力,所以呢個半馬都好空閒,可以諗好多無聊嘢。

諗步速?非也。我認為做運動應該冇壓力,做PB(Personal Best)唔應該係唯一目標,所以每次我只會嘗試以最佳訓練跑速,以及均速去完全賽事,講到底,跑步應該係享受。

諗策略?都唔係。相反我會諗好多無謂嘢去自我鼓勵,包括跑到水站有水飲代表我已完成一定距離,或者跑緊西隧大斜路會覺得自己完成緊創舉,長期保持心境愉快同正面思考,係冇咁容易氣餒。

聽呼吸節奏?我又未去到咁高層次。現階段都頗依賴音樂,節奏強勁嘅音樂幫到我保持跑步節奏,有時重會一邊跑一邊跳幾下舞。身邊跑手可能覺得我好奇怪,但I don’t care,最緊要自我感覺良好。

睇風景?老實講,香港景色見慣見熟,未必吸引到我。相反,我會將自己目光放喺遠處1個美麗嘅背影上,然後俾個目標自己追過去。當然,追唔到咪搵過另一個背影去追,有少少模擬目標,時間都過得快少少。

睇錶?一時時啦!但更多時會望靚人靚衫,悅目嘅人同物,望多幾眼,會跑快多幾步。

諗埋諗埋無無謂謂嘅事情後,又完成咗人生第4個半馬,亦係香港第1次半馬,重跑出自己最好成績!當然,跑長距離賽事,平時嘅訓練係十分重要,千萬唔好忽視呀!

T.LUM

1個鍾意做運動嘅女生。做運動好簡單,只要鍾意嘅、喜歡嘅、想試想做嘅,就可以行動。