即興旅行

Blogger

廣告

【Trend’s Like Wind by杜如風】以小女無拘無束的性格,即興的旅行會隨時發生在我身上,我知道對於一般要返朝九晚六的辦公室人士,這種旅行方式可能很難實現,但我這種社會寄生蟲,隨時可以話走就走,真好!

事緣昨天跟1位老死講電話:「我好想去旅行呀!」「我幾時都想去旅行架啦!喺香港我留得太耐就身痕架喇!」「咁不如去旅行囉!我下個星期請咗假呀,有乜好提議?」「你唔係話想去京都咩?」「我冇所謂呀,我驚你話冇嘢買咋!」「咁我又唔一定要去東京嘅,停1日大阪再去京都都OK!大阪都有嘢買嘅!」「知你『隆嘢』啦!」「好,等我去訂機票先!」「不如叫埋阿A同阿J一齊去啦!」「都好喎!」

就是以上1個這樣簡單的conversation,我們一班人後日便飛了!真爽!我們連京都、大阪的天氣都未check過,就準備出發了!然後我才跟我的導演說:「我下星期走幾日,啲voice over稿可能要遲少少先交,我計過數,趕得切嘅!」「吓!飛得咁突然?」「係呀,都係尋日同個friend吹吹下水就吹咗個trip返嚟喇!」「你都得架喇!」另一導演就說:「都慣啦!」

聽得最慣的應該是我的雙親:「媽咪,我下個禮拜去蘇梅呀!」「哦,走幾多日呀?」「10日!」「嘩!點解去咁耐呀?」「嘩!蘇梅我連續去1年都得呀!」「老竇,我過2日飛新加坡,有冇嘢要買?」「又去新加坡?同Karen呀?」「係呀,我哋好掛住啲肉骨茶同嗰7間Topshop呀!」「咁買碗肉骨茶返嚟俾我啦!」父母通常收到的「即興旅行通知」,往住都不多過1個星期,難得他們已經非常習慣,只會很簡短地問兩句:「去拍嘢定玩呀?」「去幾耐呀?」然後2人必要嚴肅地加多1句:「唔好買咁多嘢呀!」「盡能力啦!」(這兩句問答已經非常麻木!)

即興的旅行唯一的壞處是由於飛得太趕,沒太多時間執行李!飛到彼岸,必定有嘢帶漏,幸好我們通常去的都是大城市,帶漏嘢可以隨時買番,尤其是去日本,更輕鬆,很多日用品我都會故意不帶,因為日本已經有齊我經常用開的物品!

好嘢,又飛囉!來個聖誕假前的旅行,為今年的聖誕狂歡揭開1個很精采的序幕!!Yeah!

text-杜如風