【杜如風】Ice ice baby，無帶鎖匙！

【Trend’s Like Wind by杜如風】3小時前，小妹剛醒來：「大鑊喇！重未放狗、重未餵狗，最緊要係未寫《新Monday》嘅專欄，慘！」即刻彈醒！2小時半前，我帶着小狗開開心心地上天棚「放電」，大門一關：「唉呀！」太心急送牠們出去遛狗（因為這件事我平時早上11點鐘就會做了），牠們忍得辛苦了，嗱嗱臨開門啦！2小時35分前，我速速把門關上，砰嘭一聲！冇帶鎖匙呀呀呀呀呀！我立刻致電去了飲茶的父母，原來他們過了海飲茶，未走得人，於是我隨即打落樓下管理處，問問有冇士啤匙，管理員話冇，叫我搵開鎖佬，找開鎖佬是個最快捷的方法，奈何，我沒有戴bra，不宜外出，以免影響市容！那刻叫天不應、叫地不聞，幸好有帶手提電話在身，才得以通知1位好姊妹拿鎖匙來救我（小妹習慣放1條門匙在姊妹的家裏，以備不時之需），但姊妹離我家頗遠，而她又在超級市場購物中。「我要放啲嘢食返屋企，先至可以攞你條鎖匙過嚟救你啊！」「咁要幾耐啊？」「個半鐘度啦！」「OMG！」然後再致電媽咪：「你飲完茶未啊？你兩個孫話好熱啊，又口渴，想你快啲返屋企救我哋呀！」這是1個半鐘頭之前的事。