標準運動女生5項CHECKLISTS

【女生專屬byT.LUM】(IG: Teresa_Lum)

新年快樂,祝福大家跑極泰來!新年期間,大家應該進補唔少,四處去拜年,亦食咗好多賀年美食。新春喜慶,當然大家做運動嘅慾望同決心都會減低,我同大家一樣,成日都有千千萬萬個藉口去逃避,但與其無限放大藉口去令自己惰性合理化,倒不如搵個更有力理由支持自己行出呢一步。當內心有天使與魔鬼嘅掙扎,以下理由會令我豪不猶豫立刻去做運動:

– 肚內脂肪
蘿蔔糕、年糕、糖果等等,食完高熱量嘅食物,唔多唔少都有少少罪惡感,跑個步或做個運動,雖然唔代表完全消耗所攝取熱量,但起碼自己心安理得,下餐可以食得安心。

– 情緒壓力/ 太多煩惱或想法
都市人壓力就一定有,跑步其實係好好嘅方法去紓緩緊張同壓力,自己1個夜晚跑個步,俾自己30分鐘,好好重整思緒,出一身汗後,又一條好漢。

– 着靚衫
買埋買埋咁多運動靚衫,當然要物盡其用,灑盡金錢買返嚟,冇理由得個「擺」字,當然要即刻着上靚衫做個運動型一型佢。

想運動同踏出屋企門口最好唔好多過15分鐘,黃金決心期一過,惰性嘅力量將倍增。雖然話坐言起行,但女生們,出去做運動前,都應該審視以下5項checklists,務求做個標準運動女生。

1. 清爽運動髮型
長髮飄逸係浪漫象徵,但運動後加上熱汗淋漓,就變得狼狽不堪。《那些年》電影都提及男女生都係「馬尾控」,做個「馬尾女孩」不但清爽涼快,亦方便做運動時嘅走動。可選擇all back甚至用上髮帶幫忙,整潔乾淨地做運動。

2. 正確運動裝備
避免成為跑手「門外漢」造型,應選擇適當及適合嘅運動裝備。例如冬天,應避免穿着過多或棉質衣服,因運動時會排汗,衣服吸汗後會變重。相反1件跑步上衣加薄身跑步外套已足夠,保暖透氣。

3. Statement Piece
運動女生嘅宗旨絕對係「打得亦睇得」,求其嘅造型並唔係我哋嘅作風!每次跑步我都會選擇1件statement piece去代表當天跑步心情。可以係1條印花頭帶,或者係1件好閃好奪目嘅flash jacket,又可以係色彩斑斕嘅pattern tights。總之,就係要型住跑。

4. 着對跑鞋
好多少女都擔心跑步後會變腳粗,問題根本可以來自多方面,例如跑前熱身、跑後的伸展拉筋、跑姿問題等等。當然其中1點係你有冇穿着啱嘅跑鞋?波鞋唔等於跑鞋,跑步鞋需要緩震、需要保護性、需要支撐性,所以出門口前,我會選擇番適合嘅跑鞋。否則,腿形變粗事小,腳部受傷事大。

5. 愉快心情
跑步並非受罪,每次做運動都應帶住享受、愉快心情,出完汗先會有爽快嘅感覺。

有做齊以上5項checklists,唔好諗咁多,係時候出門做運動啦!


T.LUM

1個鍾意做運動嘅女生。做運動好簡單,只要鍾意嘅、喜歡嘅、想試想做嘅,就可以行動。

YOU MAY ALSO LIKE ...