【杜如風】最佳趕稿的地方?

【杜如風】最佳趕稿的地方?

【Trend’s Like Wind by杜如風】明天又要飛喇!這幾天趕稿趕到亂七八糟!小妹喜歡坐在地上寫稿,所以家中有2張茶几,1張用來寫稿,另1張用來當飯檯!稿件本來可以明天上機時才寫,但我最怕在機艙內寫稿,很侷促的。在飛機上,我通常除了睡覺,甚麼都不做!媽媽常常嚷着:「你成日都喺度寫稿,不如換張寫字檯同寫字椅俾你啦!你坐喺地下寫稿姿勢咁差,第時老咗有排你肌肉筋骨痛呀!」「唔好啦,你俾張專業嘅書檯set我,我都係踎喺張櫈上面寫架咋,冇分別!除非你搵到張會提供靈感嘅櫈俾我啦!」(叮噹好似冇出過喎!)
要趕稿,就先要有靈感,靈感哪裏來?廁所一定冇,但見到deadline就自然有!我往往都在deadline或dead deadline才交稿,連師傅陳慶嘉都說:「呢樣你就學得最足!」聽師傅們說,80年代,香港電影起飛,他們當時做編劇,是可以自選去1個國家,然後將自己困在酒店內寫,1至2個月不等。「嘩!咁爽?酒店錢邊個俾?」「當然係電影公司啦!」「嘩!好奢侈呀!咁你哋多數揀去邊個地方呀?」「東京!我哋從《小男人週記》開始,就對東京有陣情意結架喇!」「嘩!住2個月東京咪重大引誘過喺屋企寫!」「都係架,不過呢啲就係我哋當時做編劇嘅福利囉!阿女,你出世出遲咗啦!」

如果給我選1個地方去,好讓我安心趕稿,我發誓我肯定不會去東京了!因為我肯定,如果我在東京的話,不是去了shopping,就是約了朋友食飯,就算我1個friend都無,小妹都會喪煲電視,因為日本的電視節目實在太好睇了!至於我份稿⋯…吓!乜我係嚟寫稿架咋?
唔得唔得⋯…若我要找1個地方趕稿,小妹必定會選不丹!不丹的resort hotel!那裏甚麼都沒有,只有非常美麗的山景,山勢高聳入雲,望過去給人1種10級平靜的感覺。在那杳無人煙的酒店趕稿,必定事半功倍!See?一諗起,就寫完了!

text-杜如風

YOU MAY ALSO LIKE ...

There is 1 comment

Add yours
  1. 新Monday / 【《東京攻略》症候群】10大必睇杜如風專欄 - 新Monday

    […] 最佳趕稿的地方? […]


Comments are closed.