日本藥妝店松本清首香港開店 終於正式宣布地址
廣告
日本人氣藥妝店松本清（マツモトキヨシMatsumoto Kiyoshi）向來係港人去日本時必朝聖店舖，而最令人感動嘅好消息係松本清已確認會於香港開首分店，最近更有首分店地址消息啦。香港首間松本清分店選址於銅鑼灣恒隆中心，店舖共有兩層，佔地更有1.4萬平方呎，拍得住日本店。最緊要係松本清新店位於DON DON DONKI附近，雖然大家最近因疫情關係無得返鄉下，但不妨去下香港嘅松本清及DON DON DONKI止下癮先。
撰文：Janet｜圖片來源：Japan Travel旅遊網截圖、JobsDB網站截圖、松本清網站截圖、新傳媒編輯部
日本藥妝店松本清首香港開店
港人遊日本時必去嘅人氣松本清藥妝店，其實2019年7月時已宣布將會於香港開設首分店，同日本店一樣，會引入日本化妝品、健康食品等，不過香港人最愛嘅日本藥品，如感冒藥、頭痛藥等，官方暫無公佈會唔會引入。松本清並會於香港成立分公司，早前亦曾於招聘網站刊登請人廣告，包括售貨員職位，但自此就未有更多相關消息出現。
最近終於再有松本清新消息，指首間分店選址銅鑼灣恒隆中心，佔地約1.4萬平方呎，有兩層高，不過確實開幕日期暫未公布，但相信會於短期內發生。雖然疫情底下飛唔到去日本，但近期愈來愈多日本店進駐香港，如DON DON DONKI、日本燒牛丼元祖東京チカラめし（Tokyo Chikara Meshi）等，如果有埋Tokyo Hands或伊勢丹等，咁就更加不得了啦！
圖片來源：Japan Travel旅遊網截圖、JobsDB網站截圖、松本清網站截圖、新傳媒編輯部
