【Whatsapp搬家】轉場避免洩漏私隱！簡易輕鬆刪APP唔留底教學
【Whatsapp搬家】最近WhatsApp因為私隱條款問題被鬧爆引發「社交移民潮」，唔少用戶已經棄WhatsApp轉場去到Signal、Telegram或者Line等平台，但轉場前記得清乾淨晒資料先好走，如果唔係私隱依然會留底隨時被盜用。
撰文：odin ｜ 圖片來源：Whatsapp
【WhatsApp教學】簡易輕鬆刪APP唔留底
最近WhatsApp推出新私隱條款要求用戶需要同意將個人資料，分享到Faccebook或者其他旗下公司否則就唔可以繼續用落去，雖然呢條條款經WhatsApp跪低之後暫延至5月15日，但已經有唔少用戶已經跳船離開，既然大家決定走就唔好畀資料繼續保留落去，緊記齋刪App係冇用架！因為你嘅資料依然會被保存，隨時都會有洩漏嘅危機，以下幾個步驟記得跟住做，然後先刪App，咁就萬無一失啦！
【WhatsApp唔留底教學】步驟1.
啟動WhatsApp之後撳一下右上方「3點」＞「設定」。
【WhatsApp唔留底教學】步驟2.
然後選擇「帳號」。
【WhatsApp唔留底教學】步驟3.
選擇「刪除我的帳號」。
【WhatsApp唔留底教學】步驟4.
喺畫面最下方選擇返你綁定號碼嘅「國碼」以及輸入所綁定嘅電話號碼。
刪完係咪完全無問題？
最後緊記決定刪除之後所有個人資料包括頭像、通訊記錄、個人資訊等都會從WhatsApp系統入面刪除，連帶綁定手機上嘅備份都會消失，如果有重要回憶資料需要保留嘅話，記得預先匯出備份去其他硬碟上面。就算你完整刪除所有資料都好，根據WhatsApp官方表示整個刪除過程長達90日，所以呢段時間你嘅個資都未必安全，要刪就要及早行動。
