【Google替代品】DuckDuckGo單日破億搜索主打保私隱防追蹤

Jan 20 2021

DuckDuckGo其實已經推出咗超過10年，08年面世嘅DuckDuckGo一直標榜著重私隱，唔會出現好似Google咁收集用家數據，繼而出賣用戶私隱嘅問題，網民指雖然比Google搜尋範圍細少少，但起碼覺得安全，唔會畀人賣私隱更為重要。

撰文：odin ｜圖片來源：DuckDuckGo

【Google替代品】DuckDuckGo主打保私隱防追蹤

因為美國總統大選令Google、Facebook及Twitter等社交平台備受爭議，加上Whatsapp引發私隱條款加速引爆「社交移民潮」，有唔少專家表示即使用戶棄用Facebook或Whatsapp，只會散佈到各大平台，難以尋找一個足以取替主流平台嘅地方。DuckDuckGo就係其中一款可以取替Google嘅網絡搜尋器，雖然搜索範圍無主打收集資料嘅Google咁多咁廣，但至少令用戶可以用得安心，唔怕被賣私隱及出現讀心廣告等問題。

【Google替代品】DuckDuckGo單日破億搜索

其實DuckDuckGo喺2008年已經推出，一直以嚟都係以重視用戶私隱唔會收集數據為主，所有人搜索嘅資料都係統一，唔會出現讀心問題。根據官方數據資料顯示，DuckDuckGo自2010年千幾萬次全年搜索量，急昇至舊年全年搜索量高達200億次。自上年8月開始，平台月均搜索量已經超過20億次，雖然相比Google重有段距離，不過資料正顯示用戶開始嘗試使用Google以外嘅搜索引擎。DuckDuckGo自由度亦相當大，當你搜索完之後，重可以因應用家需要，透過Amazon、Bing、Google、Wikipedia或者Youtube等平台上再進行搜索，畀大家有更多嘅選擇。