社交App邀請碼有價有市想入上流社會必玩程式Clubhouse

Feb 1 2021

一波「社交移民潮」令唔少人逃離Facebook及Whatsapp，但隨之興起嘅MeWe、Signal用戶，都唔少都未坐暖就返轉頭，最大原因就係活躍用戶人數不足，令人覺得使用該平台跟原有的Facebook及Whatsapp爭太遠，難以留人，至於今次介紹呢款Clubhouse，推出短短1年，活躍用家已經達到200萬之多，足以跟Facebook等社交平台一較高低，至於點樣加入呢個App？就需要有人邀請你先加入得，至於點樣先可以拎到？一齊嚟睇睇。

撰文：odin ｜圖片來源：ebay

社交App邀請碼有價有市

好多人鍾意錄音多過打字，相比起文字世界，聲音反而係一種可以將兩個人拉近嘅媒介，凍冰冰嘅文字及靜態嘅相片，永遠比唔上聲音咁有感覺，加上好多人都好慢熱，一堆人圍埋都唔多敢開聲，喺Clubhouse入面你可以做住CD-ROM暖陣機先，當遇到合適話題先再加把聲，咁就唔使怕成為話題終結者啦！如果你好怕羞怕陌生人嘅話都唔使擔心，因為Clubhouse有好多名人率先試用，裡面有好多高質用家，齋聽都可以學到唔少嘢。

想入上流社會必玩程式Clubhouse

不過要加入呢個上流圈子並唔容易，因為Clubhouse採用邀請制度，從而過濾用戶，加上推出初期邀請咗唔少名人試玩，令到邀請碼一碼難求，一般用戶想申請全部都要慢慢等，搞到早期有Acc嘅人都會打卡威返下。直到而家隔咗成年，邀請碼依然有價有市，外國唔少人放上網賣都即時被秒殺掃光。除咗因為可以加快打入上流社會呢個吸引賣點外，私隱亦都係重點之一，申請Clubhouse只需要輸入電話號碼即可，收到短訊後會要求用戶輸入名稱，但名稱冇強制要求落真名，加上條款寫到明「Solely for the purpose of supporting incident investigations,we temporarily record the audio in a room while the room is live，If no incident is reported in a room, we delete the temporary audio recording when the room ends」。如果冇人檢舉基本上唔會有留底，呢度講時呢度散，夠晒方便。