劉德華開抖音單日吸2千萬追蹤 神還原經典一幕 【科技控】
【劉德華開抖音】當歐洲多國及印度全力圍攻抖音嘅同時,地球嘅另一邊居然有人反向而行,講緊嘅就係我哋香港嘅劉天王劉德華,一直以嚟都冇用開任何社交平台嘅佢,尋日居然公布開咗個抖音帳號,重即時整咗條片出嚟,話自己以前冇得揀喎!
撰文:odin | 圖片來源:劉德華抖音
劉德華開抖音單日吸2千萬追蹤
根據外媒消息指出,其實劉德華個抖音帳號5日前已經開咗,至於點解咁遲先公布?就有幾個唔同版本講法,其中一個就係話因為劉德華因為一直以嚟都冇開過任何社交平台帳戶,就連FB、IG、Twitter以及微博都冇,今次突然間開個抖音帳號,被系統誤以為係假帳,被系統自動歸納咗去「有問題」號觀察名單,重被限制流量搞到第一日只有72萬粉絲追蹤,連段片都只係得45萬讚好,為咗先解決問題,至會拖到尋日先公布。

