派對咖孔明︳ViuTV粵語配音版堅有廣東話rap 大癲配音員完美演繹古人RAPPER

派對咖孔明︳ViuTV出埋廣東話Rap！

ViuTV的粵語配音版《派對咖孔明》第6集－《孔明的即興說唱》中，劇情孔明需要同人rapper battle，日本版已經rap得非常精彩，估唔到ViuTV的粵語配音版竟然更誇張！因為Rap需要押韻，所以廣東話說唱的內容難免會同日本原版有出入，但聽得出雖然有改動，但仍做到異曲同工之妙！

派對咖孔明第6集－《孔明的即興說唱》中，ViuTV的粵語配音版真係有廣東話rap聽！ — 第6集－《孔明的即興說唱》中，ViuTV的粵語配音版真係有廣東話rap聽！（圖片來源：《派對咖孔明》）

派對咖孔明孔明呢種咁文雅的rap真係第一次聽！ — 孔明呢種咁文雅的rap真係第一次聽！（圖片來源：《派對咖孔明》）

派對咖孔明︳真係搵咗rapper填詞！

原來真係搵咗rapper填詞，製作超有心機！出街後聲匠製作有限公司喺facebook出post附上《派對咖孔明》第5、6集粵語Rap詞，仲分享埋粵語Rap詞創作由白空銀以及「真Rapper」現場協助錄製為冰姐。

《派對咖孔明》

粵語Rap詞創作：白空銀
真Rapper現場協助錄製：冰姐
音樂監製：DS

EP5
KABE：
(0445)高嶺之花不過似係禍水紅顏^賤男最好謹記老天有眼
就咁跨坐上床的確唔難^不過你個情況要靠神仙下凡

赤兔馬：
(0705)
YO　愚蠢嘅KABE
我而家就話你聽　只不過係一次碰釘　你就將自己嚇驚

普通人想有尊嚴要做到無休無止
唔似得少爺你出世就含住金鎖匙
出街隨身帶把刀　我把劍亦係大刀
刀唔出鞘就會生鏽^初心困住會飛唔高

到底你仲明唔明^仲喺度懶醒
你自豪嘅武器^歌詞^押韻仲有台型^都變得無蹤無影
既然跌咗落嚟　就重新登上峰嶺

你而家處於半生不死假死嘅狀態
枷鎖幾時先可以拆晒
KABE嘅神話碎成萬塊

唔准移開視線　唔好再扮睇唔見
失去所有激情同熱情　點再努力去為自己而戰

孔明：
(1809)
蒼天如圓蓋　陸地似棋局
世人黑白分　往來爭榮辱
不論昔日或當今　萬事萬物皆盡往復
非也
士別三日　當刮目相待
雖存亡之秋然侍衞之臣　不懈於內
論點遠大　彼方遼遠
獨具慧眼　荒誕無稽
雪白烏黑赤紅蔚藍黝黑都好
自由而不受拘束^音樂可不分雅俗
榮者自安安　辱者定碌碌
南陽有隱居　澀谷有KABE
我等^哈^高眠臥不足　獨一歸宿

EP6
KABE：
(0845 OS Rap)
Yeah！新手玩Rap都嚟MC Battle
將你擊敗教識你我嘅Style
我一開口會令全場鼓譟
KABE太人^Gonna Make You Go Wild
話自己由三國演義穿越？
平時睇太多中二病小說？
呢度唔係好歡迎啲人流浪
建議你快脆匿返去蜀漢
用押韻重新改造你思想
跟我學吓嘢啦^諸葛亮
不如試吓正正經經搵份工
脫離幻想係孔明嘅白日夢　Ya, Uh-ha
展現態度唔會顧而言他
拎住咪做有態度嘅Bouncer　快啲話我知你嘅Answer

孔：
(0918)在下姓諸葛名叫亮　字號雙字作孔明
要遣返我返屋企　煩請備妥時光機KABE太人　此等程度嘅口水戰　恰好喺茶餘飯後用作消遣
其實公子完全不解雄心壯志到底為何物
又不具賭上自己人生氣概去挑戰現實
倘若公子執意不聽勸　只好向你展示戰場嘅深淵　若然不幸又胃痛　即管^通往出口慢走不送

KABE：
(0949)戰場嘅深淵與我何干？
擂台嘅信念無人稀罕
呢一秒間
重要嘅係用Freestyle將呢個對決去轉危為安
我係Rap界嘅探險家
戰績輝煌嘅三連霸
Remember 連霸向你連打
對住記憶嘅按鈕大力打^Enter Boom
呢啲先叫押韻
如果我係Mother Teresa
咁呢條友就係 Mother Fuxker
押韻同抑揚會引嚟Answer歡　呼　聲
KABE太人牌Hip Hop時光機大　完　成

孔：
(1020)既然你講到你自己信念咁堅定
咁點解你又拋低信念捨得停？
若然你要玩文字遊戲作權宜之策
就讓孔明為公子解一解惑
捷報Hey Ho
送嚟捷報 Hey Ho
聖人以天~為則　賢者以地~為則
智者以歷史鑑得失　成敗關鍵在於知行合一　回望返過去嘅人生　畏首畏尾　東躲再西藏　一時嘅意氣用事會推動你去自取滅亡
甘於平凡　自我設限　KABE前路　黯淡無光

KABE：
(1058)感情　失靈　片刻故障刹停
即使決定放棄　一開口都押韻
Rap Otaku Represent J.P.N
Last Battle 係我必贏嘅Race
三國志？My Favorite毫無疑問係關雲長
諸葛孔明　心知肚明　最佳金像配角路人相　你話自己係孔明嘅話　我就係喬達摩·悉達多　你而家係唔係以為識多少少歷史就敢喺度阿支阿左^Hey

孔：
(1130)我嘅學識點都贏過你可惜我早死
可怕在你咁無知仍然愉快嬉戲
即使自知無知都覺得無所謂
你份人真係天真到令人生畏
聽住喇，孫武都有話
敵近而靜者，恃其險也；
心理戰，難分真與假，
遠而挑戰者，欲人之進也
你此刻嘅小打小鬧亦處於我所預計
無論如何　俾啲評語　我呢個新人唱成點
差唔多夠鐘係時候宣布
已經令你知道
陟罰臧否，不宜異同
論其刑賞，不宜偏私

(1316)
用長年征服戰場所學習到嘅戰略
理解天下黎民百姓內心中嘅執着
先前所設下嘅陷阱將會帶嚟轉機
歸功於我明白要贏就要知己知彼
剛才你先話決定　退縮同退後
點解又改口話再要戰鬥
如果你嘅解答令人接受
我又唔介意請你飲返杯酒
答唔出嘅話^今日呢場嘅Rap
就將會係你喺呢個世界最後嘅作品Check It Out
我諗你有啲錯算
我對故鄉^已無絲毫留戀
故鄉已無舊識　物是人早已非
問我何有所懼　一切煙滅灰飛
再回頭望返你　神情畏首又畏尾
贏家一目了然　比賽都毋須再比

KABE：
(1354 Rap)
你送嘅酒我收唔起　不如送返啲機關槍子彈俾返你　(1359)想知道我同你Battle嘅原因
我大發慈悲同你講^聽住喇冒牌孔明
你扮晒係Rap嘅初學者
Hip Hop嘅文化唔可以隨便惹
唔好睇少　Rapper代表
試吓硬食我放嘅絕招　Damage In Your Brain
我帶住呢種決心再一次上擂台
你嘅Rap點燃咗在座咁多位
所以話uh　我都要認真面對
放馬過嚟啦　Free Style Game
應該冇人唔識咩係揮淚斬馬謖
換做當時係我Don＇t Kill
冒牌孔明嘅拿手好戲　由得你得返自己演獨角戲

孔明：
(1433)律人但係不律己　睇人唔識睇自己
有眼無珠難分是非嘅馬謖以及你
斬殺馬謖係我落嘅指令
當中嘅悲傷同懊悔你又點識共情
KABE逃跑逃避　輸咗俾你自己
更加冇可能可以同悔恨感情共鳴
你兩個　有天賦嘅才能
但唔聽人意見　缺陷係一意孤行
馬謖山頂　布陣迎敵
KABE放棄戰鬥藏匿
同樣係失敗嘅事例
只係睇到自己所以當局者迷
睜開雙眼　睇一睇
而家正好係要了解自己之際
你仍然活著　站立於此地
重新站立再戰　挑戰戰勝自己

KABE：
(1511)成個老屎忽咁　冒牌孔明
我要去證明　我嘅先見之明
你啱啱呢段說詞明顯完全不在狀態
聽到馬謖呢兩個字就即刻動搖失態
我駕馭呢個beat好似滑行
BB Lounge嘅音波上隨風而行
KABE嘅Wave　不費吹灰之力
只有孔明你會喺當中遇溺
都話咗我係憑住自主意識決定放棄Rap
一早講過　Don’t You Remember
有你講　其他人就耳邊風
太自大　咁嘅心態難認同
啱啱入城咩都唔識　自以為懂
所有事情有始就一定會有終
三連霸嘅Destroyer
所有嘢要推倒重來Perestroika

聽住各位呼聲　手拎住Microphone
心中燃起火焰　再次吹起一陣順風
(反)嗰陣　我只係識得胡言亂語隨便亂噏
而家　個腦入面有無限嘅押韻同Flow
真係唔該晒你
對你無盡感激　爭啲半途而廢
冇你嘅提醒　我一生摸黑前行
好多謝在座　為你哋獻上讚歌
俾我大聲講出專屬於我嘅Answer
城市嘅夕陽　喺我眼中都褪色
淨係得逃兵　會笑住抹走血跡
或者我　其實一直以嚟都係　原地止步不前
不知不覺間　患上咗　治療唔到嘅　一思鄉就失眠
我已經返咗嚟　係　我而家就企喺你哋面前Rap　今日之後都會一直繼續Rap
用表演轉達我真心真意　全新嘗試　Classic

派對咖孔明︳網民：大癲配音員！Respect

唔少網民都大讚配音員太專業，Respect，仲問chill club可唔可以請呢2位配音上嚟！「我係為咗配音，viutv睇多次，respect」「下集chill club可唔可以請呢2位配音員」「寫得好唔好係其次，淨係誠意已經值得支持」「原本以為呢集會出日文就算，估唔到竟然配埋廣東話Rap，配音員同幕後團隊真心大癲，respect」「幾有以前TVB配音嘅味道，個陣配音會特登譯有關香港文化嘅嘢」「真係跟住原版配」「睇得出好敬業」「廣東話配到好似對手勁過孔明」「好似數白欖，好符合孔明人設」「真心我睇哂都唔覺得檻，真心屈機」