盤點TVB無線8大膠劇 《桌球天王》、《大冬瓜》、《神槍狙擊》你睇過幾多?
盤點TVB無線8大膠劇
1.《神槍狙擊》
2014年上畫嘅《神槍狙擊》,多年後仍難以令人忘懷,全因劇中所有角色被神化,例如謝天華單手攀石兼且仲要講電話,仲有死極都死唔去嘅徐子珊,令到《神槍狙擊》多年後仍然係經常被批評嘅膠劇。
2.《桌球天王》
2009年作品,被唔少網民心中膠味最濃嘅TVB劇集,鄭少秋同郭政鴻等人以功夫加桌球,劇情可謂極其誇張,而劇中最大賣點當然係「倚天Q」,仲記得當年去到波樓,個個都話自己有枝「倚天Q」……早年更被法國花式桌球手Florian Venom Kohler轉載劇中片段,令《桌球天王》成功膠出海外。題外話,鄭少秋曾經拍過晴唔少燴炙人口嘅劇集,如《大時代》、《誓不低頭》,但千禧年開始就拍埋呢啲《桌球天王》,反差會唔會太大呀?
3.《大冬瓜》
TVB於2009年作品,另一被網民選為膠劇中嘅經典,首先一聽到劇集名已經feel到陣膠味,至於劇情上,由已故嘅智叔廖啟智所飾演嘅范統,屬於灶王爺門下四大神仙弟子之一,因為一犯錯而被王母娘娘責罰,困於冬瓜之中閉門思過。困喺冬瓜喎,聽到呢度大家都諗到《大冬瓜》有幾膠啦,連擁有神級演技嘅智叔都救唔返套劇…
4.《強劍》
2007年古裝劇,雖然套劇叫《強劍》,但套劇一啲都唔強,由黃宗澤同鄭嘉穎主演,係一套大量加上特技嘅武俠片,但劇情尾段開始爛尾,Bosco同鄭嘉穎除咗照抄《唐伯虎點秋香》情節外,又講到佢地識龜波氣功咁,你話膠唔膠先?
5.《荃加福祿壽探案》
2011年嘅TVB台慶劇,由王祖藍、阮兆祥及李思捷加上阿姐汪明荃主演,論cast算係大製作(雖然有李思捷…),不過《荃加福祿壽探案》只係不停炒冷飯,不停搞舊gag,以及玩食字遊戲(其實有阮兆祥,大家都估到…),令唔少人覺得爛尾。
6.《王老虎搶親》
又係2009年作品(TVB喺2009年真係特別多膠劇),大師兄錢嘉樂難得首次擔正劇集《王老虎搶親》主角,不過劇集負評如潮,如陳鍵鋒扮女人,大量為搞笑而搞笑嘅gag位,加上大量不合理穿崩位,令《王老虎搶親》成為TVB膠劇經典之一。
7.《十兄弟》
《十兄弟》於2007年上映,屬於重拍經典粵語長片,雖然被網民評為膠劇,但其實劇情真心一啲都唔膠,膠嘅其實係劇中十兄弟嘅造型,咁睇返啲造型,確實幾難令人接受嘅。
8.《叛逃》
要成為膠劇,唔需要成套劇都膠,其中一幕夠膠已經可以成為經典,關禮傑跳過隔離大廈天台呢一幕,都唔使筆者再多介紹啦,絕對係TVB有史以來最膠劇情。