【日本疫情】松屋不敵新冠肺炎！食客大跌勁蝕26億！37年歷史池袋西口分店結業

撰文：馬高斯 ｜圖片來源：日本松屋｜編輯：海月

【日本疫情】松屋不敵新冠肺炎！食客大跌勁蝕26億！37年歷史池袋西口分店結業

最平只需320日圓（約24蚊），有碗牛肉飯加麵豉湯，仲要開24小時，小編去日本旅行果陣，凌晨見肚餓就最鍾意去松屋食返碗「細牛」！松屋同吉野家、Sukiya齊名，係牛肉飯三巨頭，喺日本擁有過千間分店。不過咁大規模嘅企業面對疫情都係無晒計。

大眾為咗減低傳播風險，逐漸減少外出堂食，松屋都走唔甩出現虧損情況，堂食嘅客量已經下跌咗兩成。其母公司「松屋食品」亦表示，預計去到明年3月，全期將虧蝕近26億日圓（約1.93億港元），係2007年後首次錄得虧損。

眼見危機迫近，松屋都諗計救市，最基本加強店舖嘅衛生，員工要做好消毒清潔，等客人可以安心堂食。另外仲新增手機app點餐服務，致力發展外賣業務，希望從困境中找出生機！

東京前排先錄得單日感染人數新高，近日開始緩和由跌落三位數，小編相信呢種上上落落嘅拉鋸情況將會持續，大公司諗計救市之餘，大眾都要增強防疫意識配合先得！