香港人注意！天文台預告氣溫斷崖式下跌｜下周三最低13度 網民崩潰：又要著羽絨！

下周二氣溫突插水式急降

根據天文台最新發布嘅天氣預報，雖然未來兩三日天氣大致良好，但原來只係暴風雨前嘅平靜！一股強烈東北季候風補充預計會喺下星期一（11月17日）晚上殺到廣東沿岸，本港天氣將會喺下周二（11月18日）出現戲劇性轉變，氣溫顯著下降。天文台更特別指出，屆時將會「風勢頗大及有一兩陣微雨」，濕凍天氣嘅威力絕對不容忽視，而最低氣溫更會喺下周三（11月19日）早上市區錄得約13度，新界地區預料會再低幾度，各位市民務必做好禦寒準備。

天文台解畫天氣急轉彎真相

對於今次天氣突然變臉，天文台亦作出詳細解釋，目前影響華南沿岸嘅係一股較為乾燥嘅東北季候風，所以市民普遍感覺清涼舒適。不過，下周抵達嘅將會係一股「強烈」嘅季候風補充，強度同濕度都同而家呢股完全唔同，所以先會造成氣溫急降嘅效果。天文台官方預測表示：「一股強烈東北季候風補充會在下星期一晚上抵達廣東沿岸，隨後一兩日該區天氣顯著轉涼。」不過好消息係，隨著季候風喺下周後期稍為緩和，氣溫將會逐漸回升，短暫嘅寒冷天氣有望結束。

網民聞凍色變哀嚎遍野：「終於有冬天感覺！」

天氣預告一出，立即引爆全港網民熱烈討論，反應相當兩極！唔少怕凍嘅網民已經開始叫苦連天，紛紛留言洗版：「又要同張床搏鬥過」、「打工仔表示悲哀，朝早點起身呀？」、「最憎又濕又凍！完全唔想郁」、「13度？我啲羽絨褸呢？」。不過，亦有大批期待冬天已久嘅網民表現興奮，力撐天氣轉涼：「終於可以打邊爐！」、「太好啦，終於有冬天嘅感覺」、「衣櫃入面件大褸終於可以出動！係時候買新衫」、「熱咗咁耐，凍下好呀！唔想再開冷氣」。