內地男女遊山頂跌iPhone報警求助｜警員冒險執機鬧爆：「唔會搵條命同你博」｜影片上傳抖音反遭網民狠批？

警員太平山頂冒險爬坡 執手機全程被拍下

從網上流傳的影片可見，事發地點為太平山頂步道，一名警員已攀越欄杆，在陡峭的石堆中小心翼翼地尋找手機。期間警員向事主直言：「我哋應該唔同你執㗎，警察都係人，阿叔都講得啱，唔會搵條命同你博，啱唔啱呀？我哋都打份工㗎咋」，並指事主自己不小心，不應為此報警。另一名警員則要求女事主登記資料，並以普通話說：「那麼年輕，你也不走下去，要我們老頭子走下去，還有你看到我們嗎？我們（裝備）很重的」，語氣中充滿無奈。

警員要求事主上小紅書讚賞：「同我讚呢個阿Sir」

在警員成功尋回手機並交還給女事主後，同行男子仍未停止拍攝，引起警員注意。一名警員先是勸阻：「唔好影啦，先生」，但另一名警員隨即帶點自嘲地說：「你影唔緊要，影完你同我讚佢，你返去同我小紅書，同我讚呢個阿Sir」。事主其後果真將影片上傳至抖音平台，但似乎未有領會到警員的弦外之音，反而引來大量負評，最終在輿論壓力下將影片刪除。

網民狠批濫用警力：「下次跌落海係咪叫水警執？」

影片曝光後，網民幾乎一面倒地狠批事主濫用警力，認為此舉浪費公共資源，更可能令真正有需要的人得不到及時協助。留言區被負評洗版：「下次出海跌左電話落海，係咪可以叫水警幫我執？」、「開左個頭，咁即人人都得」、「叫消防，特別服務收費$3,000起跳（非人命）！」、「仲叫人up小紅書，真係自找麻煩了。以後大把人有咩事就報警，叫免費執野了。」大部分留言都認為事主行為自私，將個人疏忽的責任轉嫁到執法人員身上，完全不能接受。