突破傳統框架：旨呈於九龍殯儀館舉辦音樂會以歌聲道別
音樂會創新概念
旨呈表示，他最初對這個提議感到非常驚訝，「我嘅感覺最初係好奇怪，直情覺得係一個伏嚟，係咪詐騙？但後期溝通後知道佢哋想破格去做一啲唔係以前嘅葬禮或喪禮，想做一啲反傳統嘅嘢，用流行曲嘅形式去道別。廣東歌帶有好多唔同嘅Message，點解唔試嚇用時下呢個年代大家會記得嘅歌曲去告別呢啲曾經最愛嘅人呢？甚至乎一啲將會離開嘅人，點解唔可以畀佢哋用一啲屬於佢哋自己嘅歌呢？」他認為，這種方式不僅讓參與者學到新事物，還能以更開心和光明的方式來告別，「除咗係我學到嘢外，一齊參與音樂會嘅人亦有嘢帶得走。唔一定再係死板用另一啲方式去離開呢個世界，可以好開心、英俊、光明磊落，用一啲歡笑嘅方式去道別呢件事。」
籌備過程挑戰與創意
在音樂會籌備階段，旨呈與團隊進行了深入的討論和準備。「很多人對於死亡、生死有很多看法，亦有很多香港人都喜歡用特別嘅方式告別，於是我就上網集思廣益，而我自己亦有一個歌List，每個人都會有，我會係《活著多好》，呢個係我最想聽嘅一首。我問嚇網上嘅人，竟然有人係寫《活著Viva》、《係咁先啦》、《喜氣洋洋》……好多好多出乎意料嘅歌曲佢哋都會想用嚟做告別式。」他們決定不再使用傳統的座位排列，而是將座椅圍成一個圓圈，讓參與者能更加感受到彼此的存在，「今次將所有櫈擺到一個圓圈咁，圍住中間一個圓圈，中間放了一副棺材、鋼琴、結他。過往實在是太過死板了，我想做呢個音樂會大家係圍住，大家都可以Feel到大家嘅存在，就喺隔離、附近，用呢種形式去表演音樂。做咗好多Research、前期等，令喪禮有舞台嘅效果。唔係為咗舞台而設計，而係過往嘅框框令我哋只係坐喺側邊，今次圍圈當大家都望住大家時，感覺會更有愛。棺材亦擺滿咗心心，表示一種愛嘅存在。就算最愛嘅人離開都係一種愛，我哋幫佢做告別式，都係我哋對佢哋嘅一種愛。」
音樂會深刻影響
完成了兩場演出後，旨呈對此感觸良多，「兩場都爆滿，坐滿晒人。我好驚訝我喺唱某啲歌曲時，有好幾個人係啜泣咗嚎哭。我覺得能感動到人，令大家投入到音樂會係非常好嘅事。」他發現其中一位觀眾患有末期癌症，對此感到非常感慨和感恩，「我好感慨同感恩一個生命行到最後嘅人，仍然喺我呢個音樂會上由頭聽到落尾，陪住我，我都好多謝佢畀咗生命之中最寶貴嘅時間喺我呢個音樂會上。我覺得生死教育好重要，每個人都有對死亡嘅睇法，有恐懼，樣樣嘢都可以㗎，冇嘢係唔可以。最緊要係要知道每個人都可以用自己喜歡嘅方式去同所有嘅親朋戚友道別，呢個係今次音樂會最大嘅感受。」