行山Youtuber Herman被封偷狗賊!唔肯歸還別人家的狗仲大條道理拎晒光環
Youtuber大帽山執到柴柴 即駛成皮嘢做暫托
事緣呢位行山Youtuber 「Herman靴文」日前早上10時半時喺大帽山川龍救起一隻自稱係走失的柴犬,指呢隻戴住頸圈的柴柴亂跑馬路,於是睇睇唔過眼將佢救起,並上網出post尋狗主。當日,Herman除咗即時帶咗狗狗去睇醫生做檢查之外,作為暫托者的佢仲有訓練柴柴、入手一波狗狗日用品、食物、床、圍欄等,足足加埋駛咗成萬銀。Herman表示仲有同漁護署溝通,指柴柴係無晶片亦搵唔到主人資料。
短短一日後將人哋隻狗據為己有登記晶片兼改名「卷卷」
大約十四小時後,狗主已經聯絡咗Herman同佢女朋友,但結果不歡而散。Herman表示狗主聯絡時態度甚差,主人聯絡後,Herman喺IG搞投票,問大家支唔支持佢比返狗主,16個鐘內最後決定將柴柴據為己有改名「卷卷」,仲幫埋隻柴柴登記晶片,強調真正愛狗人唔會反對佢哋呢個決定,係深思熟慮,而唔係一時衝動,仲話隻柴柴開始適應新環境。
要求原主人俾成皮先肯還狗
根據《香港動物報》報導,柴犬名叫「多多」,現時6歲,平時同3隻柴犬喺村屋花園生活,一直都係任由佢通屋走,有時多多曳曳會跳出圍欄四處走,但識得返屋企,而當日早上狗主因照顧小朋友,所以睇唔住多多,跟住有即刻出去搵狗,但搵咗好耐都搵唔到,以為多多會自己返屋企,點知無,狗主好少上網,唔知Herman有上網出post,直到第2日狗主太太上網搵到先知。狗主就表示Herman要求拎返柴柴睇醫生同埋花費的一萬元先肯俾返狗狗,覺得好唔合理,明明隻狗無病無痛。狗主強調狗狗唔見咗都有即時搵狗,亦已經提供晒相片證明係狗狗主人,形容家中的小朋友都好掛念多多。晶片方面狗主表示無可能check 唔到,強調自己有多多狗牌,只係因為疫情嗰時無續牌,其後已報警。
Herman女朋友唔驚報警:我哋係晶片登記主人
Herman的女朋友就唔承認有問狗主拎返一萬元,而家唔肯俾返隻狗人係因為對方態度差,而且唔負責任,根本無辦法確保狗狗安全,仲話唔係見係靚柴柴先咁做,換轉係唐狗都會照救,同埋表示雖然警方已聯絡佢,但佢而家先係晶片登記主人。
網民:根本就偷狗賊!想養狗好耐
網民翻出Herman的舊照,發現Herman一直都想養狗,加上未夠一日就買成萬元的狗用品,非常質疑Herman本來就想將柴柴據為己有。「$3,000睇醫生都算,一日就買$7,000日用品比隻狗,係咪一開始就冇諗住比返人先?」「拐子佬以後都有光環」「唐狗既話一早比返左人啦」「咁周街都可以搶狗啦」「地上執到寶」「搶人隻狗仲可以咁x大條道理」「執到狗 1日內就咩都做齊 3個鐘內打埋晶片,前題係隻狗表面無事,行得走得,條友都係一心想囉走隻狗架啦」
冬至一家四柴終於團聚!
根據facebook尋狗group 網民更新最新消息,終於去到今日(22日)的中午5時,多多狗主終於喺警署拎返多多。而唔少網民都譴責YouTuber Herman,而其Facebook 尋狗page的管理員就以千字文評論同總結呢件事,指動物係屬個人財產,因貪念將他人的個人財產據為己有,就算個理由有幾偉大都係唔啱。而且住村屋的狗放養式係咪即等同對隻狗唔好呢?同埋咁樣拆散一家4柴,用自己的方式對別人執行家法又會唔會太過狂妄?