試當真｜多角度寸爆現今偶像粉絲文化 網民：咁敢言講MIRROR？

試當真︳游學修對白句句鬧得狠 疑影射現今偶像

《試當真》近日推出新劇場《豪哥歌》講述飾演Hater的游學修在豪哥的演唱會中擲出「震撼屎彈」，之後再衝入後台鬧爆豪哥唱歌未夠班：「你唔係歌手，一個歌手係可以將唱歌變成專業，你憑咩啊？字你都未咬得清，拍子你又未跟到，五音不全，你侮辱緊唱歌，你侮辱緊觀眾，你侮辱緊個行業啊！」網民都話覺得游學修呢段鬧得好，仲話似係鬧緊現今唔少唱功未夠班嘅偶像派歌手！

試當真︳多個場面疑似暗寸MIRROR同花姐？

此外，網民都指新劇場多個場面都疑似暗寸MIRROR粉絲所形成嘅追星文化。例如《豪哥歌》一開波，Nero就企喺門外兜售高達$3888黃牛票，雖然票價高得離譜，但依然有忠實粉絲願意去買，令網民聯想到去年MIRROR演唱會原價$480的門票一度炒至約$6,000一事。

當游學修喺豪哥演唱會引起混亂之後，豪哥被經理人Yanny護送落台，Yanny仲話：「我唔準你為咗一個Hater而失去重心，你唔信你自己都要信你經理人，我捧得紅你代表咩啊？代表我勁啊！」網民都話覺得Yanny同MIRROR經理人花姐嘅語氣好相似，仲同花姐一樣過度保護藝人添。

試當真︳周殷廷客串演無名歌手 網民：YT值得更紅

歌手周殷廷今次亦有份客串有實力但未能獲得公司力捧的無名歌手。網民都留言表示好開心可以見到周殷廷嘅演出，並且表示覺得佢「跳得又唱得又型仔」，希望更多人會認識佢，認為佢值得更紅。

試當真︳寸完藝人寸埋粉絲同Hater！

《豪哥歌》呢條片寸得夠晒「平衡」，除咗狠評偶像之餘，仲諷刺埋粉絲同Hater！粉絲過份盲目追星而令偶像退步，而Hater簡直就如同忠粉，同粉絲一樣投放咁多的時間去狙擊對象。

試當真︳網民留言大讚有共鳴：修仔終於講左我想講嘅嘢

今次《試當真》新劇場一推出，唔少網民都紛紛留言大讚有共鳴，又讚試當真團隊將敏感嘅話題用此方式呈現出嚟，影片非常高質！

一齊睇試當真新劇場《豪哥歌》：

網民都讚游學修講得好！