熱血最強!  10大日本洋蔥運動漫畫

熱血最強! 10大日本洋蔥運動漫畫

《全力扣殺》戚冠軍(林敏驄演)大大聲講:「做人點可以冇火!」,睇到小編有團火喺個丹田一直湧到上喉嚨再噴出嚟,我要爆啦,真係好熱血!
講起運動漫畫,一定係日本漫畫最熱血:通常呢啲漫畫都係講本身體格平平或有心理陰影嘅主角,為咗女又好為咗友誼都好,就搏命咁日練夜練;當中同拍檔甚至強敵建立友誼,最後重突破到自己!呢啲運動漫畫主角全部都係以汗水同淚水編織而成,令你睇到毛管戙,繼而熱血沸騰想即刻走出街周身郁!

以下落嚟介紹嘅「10大熱血運動漫畫」,就算你內心幾冷冰冰都好,都會令你內心起火,甚至流下男兒淚!

text-Oscar

 

《Slam Dunk》 作者:井上雄彥
絕對稱得上日本運動漫畫熱血No.1,就連主角櫻木花道嘅頭髮都係火紅色,真係熱血到出面!
我諗無數人同小編一樣,為咗追睇湘北鬥山王工業嘅最後一戰,捱咗幾晚通宵!有人話作者井上雄彥老師投射咗NBA「籃板王」洛文喺《Slam Dunk》主角櫻木花道身上,但點都好,至少我覺得櫻木永不言棄嘅態度,一定係所有籃球初哥嘅學習對象,佢決戰時射最後嗰球1句「左手輕輕扶住」嗰種專注真係man到爆!

output_oF9cHu

 

《足球小將》 作者:高橋陽一
數最熱血運動漫畫,藍球有《Slam Dunk》,足球一定係《足球小將》No.1。
當香港未有咁多足球直播,大家對球星印象模糊嘅年代,戴智偉、小志強、林源三、麥泰萊曾經係足球場上嘅偶像,而呢班主角亦陪伴住大家成長,點樣帶領日本隊衝擊世界杯!不過,小編對1場賽事要踢幾年,個波過半場都講足幾集印象係最深刻……

output_B1UiNE

 

《Eyeshield 21高速達陣》 原作:稻垣理一郎 繪畫:村田雄介
極少數以美式足球為題材嘅漫畫,講述瘦小嘅主角小早川瀨那因為跑得快,而被拉入學校嘅美式足球隊,以神秘嘅「蒙面21」身份不斷咁幫球隊擊敗對手。雖然同好多漫畫一樣,故事都係講主角由唔鍾意美式足球到變成隊中主力,但個人能力加團隊合作嘅精神放得超大,愈睇愈手心出汗!

output_xpXlX3

內容延讀:

韓星瘋搶蜂蜜牛油薯片 有港版喇﹗

買鞋呃你唔到!波鞋街術語全晒冷

 

《鐵拳浪子》 原作:梶原一騎 繪畫:千葉徹彌
最經典拳擊漫畫,主角矢吹丈由爛泥MK仔變成可以同職業拳王較量嘅拳擊高手,成長道路既艱辛又悲壯。漫畫調子極灰暗,好似矢吹丈最強宿敵之一嘅力石徹,為咗減鎊賽後暴斃,令矢吹丈每次諗起同佢比賽都會嘔。現實中一班粉絲更曾為力石徹舉行葬禮。漫畫ending,矢吹丈生命燃燒殆盡、垂手坐喺繩角嘅一格定鏡,絕對係經典中嘅經典,熱血得就算再過一百年都令人難以忘懷,係套充滿洋蔥嘅漫畫。

output_Rm757W

 

《網球王子》 作者:許斐剛
主角越前龍馬細個嗰陣,就由阿爸訓練成網球員,所以一入高中網球部就成為正選,但當遇到更強嘅隊友同對手後,漸漸喺網球中搵到目標。不過,呢套漫畫更啱女讀者,因為所有角色都係走美男路線……

output_jkgo8O

 

《Touch》作者﹕安達充
同樣係熱血漫畫方程式嘅最佳示範,單行本銷售超過1億本。故事講述一對孖仔﹕達也和也愛上同一個女仔小南。達也從小就係運動天才,亦非常愛護弟弟和也。表面上懶散嘅佢,被棒球天份高嘅細佬盡蓋光芒,實則係處處讓住細佬,連愛情都係。後來和也意外過世,達也接替和也捧球位置,最終憑天賦同努力攞到甲子園入場券。
《Touch》對青春、勝利、追救夢想描寫細膩,影響住幾代人。

output_CHWLdu

 

 

內容延讀:

韓星瘋搶蜂蜜牛油薯片 有港版喇﹗

買鞋呃你唔到!波鞋街術語全晒冷

《幻影籃球王》 作者:藤卷忠俊
《幻影籃球王》可以堪稱為「21世紀嘅《Slam Dunk》」,喺日本非常受歡迎,就算故事已經完媧,但人氣未見倒退。故事講述主角黑子哲也以「夢幻第6人」身份,同另一籃球天才火神大我,向其他強手挑戰而不斷挑戰自己嘅故事。

output_Qb9Ozn

 

 

《熱鬥小馬》 作者:津野丸
一隻外貌生得怪,而且腳又短嘅馬仔拉屎藏,經過不斷訓練成為馬場上嘅王者故事。雖然拉屎藏血統優良,但都需要努力先可以成功,更何況我爸不是李剛,我阿爺唔係李超人嘅你同我呢?

output_rny0jy

 

 

 

《我要高飛》 原作:森末慎二 繪畫:菊田洋之
相比球類運動,體操漫畫可能有啲悶,但主角藤卷駿唔止玩單槓玩到有動作以佢命名,重鼓勵埋身邊嘅隊友,令校隊成隊節節向上,非常熱血同感人。

output_ARMfhd

 

《去吧!稻中乒團》 作者﹕古谷實
我知我知,你覺得《稻中乒團》絕對入唔到「熱血運動漫畫」嘅cat嘛!咁只係你睇得唔夠深入啫。其實呢套漫畫喺屎尿屁背後都有講下友情同愛情嘅,好似竹田同岩下嘅愛情、又或者竹田、木之下呢兩位正常中學生,對住前野、井澤、田中、田邊呢4隻披住人皮嘅禽獸不離不棄就係熱血友誼嘅最好證明(連我自己都覺得勉強)。

YOU MAY ALSO LIKE ...

There are 3 comments

Add yours
  1. 新Monday / 【Gel頭的重要性系列之】3分鍾學識變張震 - 新Monday

    […] >熱血最強! 10大日本洋蔥運動漫畫 […]

  2. 新Monday / 《新Monday》跑步影像企劃 Run2Connect「父女篇」~絆 - 新Monday

    […] >熱血最強! 10大日本洋蔥運動漫畫 […]

  3. 新Monday / 直擊!台灣《One piece》跑 - 新Monday

    […] >再睇下10大日本洋蔥運動漫畫 […]


Comments are closed.