土炮《街霸》發聲出閃波figure  Ryu:「霞多ken」

土炮《街霸》發聲出閃波figure Ryu:「霞多ken」

人類已經阻止唔到全世界都翻兜經典嘢,呢套由本地新晉玩具品牌BigBoyToys推出,以《街霸》經典角色造figures就非常吸引,更會先由永恆主角Ryu打頭炮。咪以為土炮出品就差啲,呢套《街霸》figures均由日本Capcom授權同監修,全部攞正牌製作,加上每隻都有發光同發聲效果,撳1下地板嘅開關掣後,Ryu就會發出「霞多ken」(即係波動拳)嘅遊戲原音,同時個「波」亦識發光,極具可玩性。

BigBoyToys由Leo、Edward同Poon聯手創立,佢哋話呢套figures由構思到進行用咗1年時間,當中最麻煩係要同日本方面交涉,因為生產前要先畫圖,再以人手雕刻prototype俾日本過目,批咗先可以投產,因此預計每4個月先會出到隻新嘢。佢哋又透露全套figures暫時計劃會去到Bison(以前叫赤目司令)為止,即係最初嘅12個角色,想玩豪鬼應該有排等,但香港人氣最高嘅「阿力cool」軍佬,最快出年年頭就會出,期待!

YOU MAY ALSO LIKE ...