母親節前,7種你不可不知嘅花語(時裝篇)

流行娛樂

廣告

留意!聽日就係母親節喇(做唔做得成孝子就睇今鋪)!重未買禮物?又唔知買咩好?傻豬嚟嘅,唔使驚!買花諗唔諗得過先?既方便又快捷,而且女士們大多對收花都冇咩抵抗能力,今次一於由各個時裝品牌用到嘅各種花print入手,教大家唔同花嘅花語,送啱花咁窩心,伯母一定冧!

text-Khloe

1. 山茶花(花語:含蓄的美/謙讓/美德/可愛/富魅力)
品牌:Chanel

想起Chanel女士,你一定會諗起佢最愛嘅山茶花。山茶花顏色潔白,感覺純潔優雅,不過Coco Chanel女士之所以咁愛山茶花,據說係因為山茶花係佢嘅畢生摯愛Boy Capel送俾佢嘅花,所以不難發現喺Chanel嘅時裝設計上時常用到山茶花標誌,聽到呢到都覺得浪漫…(可以推介埋俾想送花俾老婆嘅daddy喎!)

內容延讀:

〉送完花再送蛋糕 4個令人葡萄嘅母親節蛋糕

〉母親節冧媽必食 4大注目潮型中菜

2. 蘭花(花語:高潔/美好/賢德/自信)
品牌:Fendi

延續上季秋冬嘅蘭花圖案,創意總監老佛爺Karl Lagerfeld以佢喺柏林無憂宮皇家溫室館資料庫所睇到嘅一朵蘭花紀錄圖為靈感,以唔同嘅印花同刺繡呈現喺今季嘅服飾上面,高貴非常。蘭花種類好多,雖然價格較高,但非常優雅耐看,有budget的話,可以諗諗買蘭花送俾媽咪。

3. 滿天星(花語:關懷/思戀/真愛/純潔/喜悅)
品牌:Givenchy

細細粒嘅滿天星夠清,啱晒低調又溫柔嘅媽媽。話說Givenchy今季大玩滿天星印花圖案,上至最signature Pandora Box,下至backpack款同鞋都印上滿天星,浪漫到暈。

內容延讀:

〉送完花再送蛋糕 4個令人葡萄嘅母親節蛋糕

〉母親節冧媽必食 4大注目潮型中菜

 

 

4. 玫瑰(花語:愛情/純潔的愛/美麗/美好)
品牌:Dolce & Gabbana、Ted Baker

玫瑰向來都係各品牌愛寵,好似Dolce & Gabbana同Ted Baker今季都有好多玫瑰花items,前者性感艷麗,後者清新脫俗,無得輸!其實,玫瑰唔係只係送俾情人嘅專利,可以好似錫愛人咁一樣咁錫媽咪,送玫瑰俾媽咪佢一定甜入心!不過送玫瑰俾人之前,要注意唔同顏色嘅玫瑰花都有唔同嘅花語,好似紅玫瑰係熱戀、白玫瑰係高貴、尊敬及智慧嘅意思、黃玫瑰係純潔嘅友誼同祝福等等。

5. 扶桑花(花語:新鮮的戀情/體貼/纖細/清新)
品牌:Fleamadonna

老老竇竇,我本身一直都唔係好知呢種花叫咩名(大概會叫做夏威夷花之類吧),上網做下research先知叫其實係叫扶桑花,係夏威夷州花,溫暖又有度假味道,難怪韓國大熱品牌Fleamadonna今季用上大量扶桑花拚出signature心形圖案,少女味特濃。

內容延讀:

〉送完花再送蛋糕 4個令人葡萄嘅母親節蛋糕

〉母親節冧媽必食 4大注目潮型中菜

6. 罌粟花(花語:死亡之戀/遺忘/令人窒息的美)
品牌:Marimekko

Marimekko嘅罌粟花圖案色彩鮮明,日用夜用成功變成品牌招牌圖案!罌粟花,又名鴉片花、大煙花、英雄花,不過大家對罌粟花嘅花語抱有唔同嘅解釋,好似有人話代表希望之花,又有人話係「死亡之戀」,所以穩陣起見,都係唔好送俾阿媽喇知冇!

7. 鳶尾花(花語:愛的使者)
品牌:45R

5月係鳶尾花盛開嘅季節,顏色種類多,而且因為花語有「愛的使者」嘅意思,令到日牌45R更特以鳶尾花為主題推出咗一系列衣飾,向各位媽媽表達感謝同愛意,sweet!