百年日牌SHIMANO出名慢工出細貨，雖然上年先推出山車套件11變速XTR M9000系列，唔係新鮮嘢，但SHIMANO出名耐用兼穩定性高，好多山車友更認為佢比SRAM更襟兼少維修，所以自然有一班支持者，而且玩開都知頂級XTR出得，下一季就到低一級嘅XT系列發功。冇錯，上年11月先正式推出嘅XTR M9000，唔夠半年時間，SHIMANO就再公布旗下DEORE XT系列M8000嘅11速變速組件，此系列出晒名性價比高，耐用度高又只係頂級XTR約一半價錢，而且香港代理鎮洋兄弟單車更話明會全亞洲最早到貨（約今年6月），定必成為AM及XC車界大熱套件。
text – England photo – Sun
新M8000套件雖然價錢特定，但代理方面講明同現行M780系列差不多，以今次呢套（未計hubs）約6千幾，確係抵玩！
今次XT M8000系列共推出1×11、2×11、3×11 3種crankset選擇，但當然單及雙餅係最受歡迎。
今次發布會中，SHIMANO就展示出2×11 crank，內側可以睇到塊餅後面用咗碳纖混合物料以減輕磅數。
單或雙餅嘅11速飛輪由11T至42T（XTR M9000最大亦只有40T），不過，如果3餅嘅話，最大就只有40T。
既然有11速兼42T飛輪，我推介大家用單餅就無須裝呢個波撥，少埋指撥及波線，成架車更加瀟灑。
新波尾採用SHADOW RD+技術，可提高穩定性及轉波速度。留意波腳同上代一樣有掣（下圖），可收緊波腳拉力，令下坡減低擺動幅度及打鏈情況。
今次XT M8000嘅碟剎黑銀色coating非常有型，而且更可用較細嘅140mm碟片，相信可使用於Cyclo-cross（越野RB）上。
鎮洋兄弟單車 上水新豐路132號地鋪 2670 3639
伸延閱讀：香港單車勁人報料-台灣車展8大預覽
