遊戲大時代 RESTART  

遊戲大時代 RESTART  


經常覺得,我哋呢班經歷過80年代嘅人係幸福嘅,因為可以見證好多科技革命,其中1樣,叫「電子遊戲」。
我係玩紅白機、入兒童場打街機嗰代嘅人,對小時候曾經沉迷嘅玩意特別有感覺,見到時下年輕人,手執1部iPhone,屋企擺多部PS4就已經滿足,真心覺得可憐,因為佢哋冇體驗過真正全民打機嘅瘋狂時代,嗰陣人人都識打《街霸》,遊戲選擇多,主機層出不窮,非常好玩。
懷舊嘢不死,原因係可以喺懷舊嘢當中見到文化嘅起伏。作為最能代表當代科技嘅gadget,遊戲機唔止係小朋友玩意,細心研究,你會發現細細部遊戲機入面充滿科技成果。近期葵芳工廠區入面有間叫RESTART嘅鋪頭,擺滿各個年代嘅遊戲機,部分仍然運作正常。RESTART嘅3位創辦人同樣愛死7、80年代遊戲,搜羅舊機再搵地方展覽,一為興趣二為理想,希望能夠將好多已經唔work嘅遊戲機重新嚟過,變成有用嘅嘢;場內亦有部土炮街機俾參觀者任玩,等大家重拾「擺低1蚊跟機」嘅樂趣。

text – Nam photo – Pakco、網上圖片

http://www.youtube.com/watch?v=LkXcmcWo9Uw

RESTART

地址:葵涌健康街13號萬利工業大廈508號鋪(須預約)
電話:9546 8767

大圖呢部主機Vectrex,1982年出品,屬早期家用遊戲機,特點係講明用街機系統(Arcade System),冇插帶冇駁線,接通電源後開機即玩。
大圖呢部主機Vectrex,1982年出品,屬早期家用遊戲機,特點係講明用街機系統(Arcade System),冇插帶冇駁線,接通電源後開機即玩。
主機連埋手掣,非常low-tech,都有少少街機感覺,4粒掣各有功能,RESTART做display嘅呢部,開到機兼玩得。
呢個就係遊戲畫面,玩家控制飛機射爆版圖上所有敵人就過關。除咗射擊,亦可撳掣做出飛行或空間跳躍動作(即由A點突然跳去B點),玩咗陣覺得都幾有趣,好考技術,正過而家啲玩卡片嘅手電games。

舊機改裝重生
RESTART開業唔夠1個月,由創辦人M、Daniel同阿柏各司其職,其中負責整機嘅Daniel更加係經驗豐富,早喺80年代已喺高登整機、砌老翻Apple電腦。唔太願上鏡嘅佢,話搞RESTART最大原因唔係為錢,而係想有個地方,俾一班經歷過遊戲機黃金時代,又已經成家立室嘅機迷聚下,所以RESTART大部分珍藏都係非賣品,亦冇固定營業時間,上到去想點玩都悉隨尊便。

不過,開得鋪始終都係做生意,Daniel會搞維修或改機服務,價錢都好平,好似紅白機改HDMI輸出都係收$500(連維修同檢查),或者舊嘅有線遊戲耳機都可以變無線耳機,有興趣不妨打去預約傾傾。

RESTART裝修唔算勁靚,亦冇乜配套,最大已經係呢個空間,不過可以睇到好多古董遊戲機。
全場最好玩就係呢部街機,用大陸底板,幾百合一嗰隻。部機唔係for公開俾人玩嘅,只係收藏之一。
牆邊層架就放滿遊戲CD,唔同主機都有,想試都可以試,但只有小部分唔係非賣品,總括嚟講,RESTART有啲似機迷聚腳地,打機吹水。
Daniel負責維修嗰part,任何舊機俾佢檢查下就知有冇得救,拍攝時攝記意外將Vectrex插錯電掣,成部燒咗,但最後Daniel都竟然整得番。
周不時上網見啲網絡達人將舊機改裝,Daniel都做到,重將1部壞咗嘅任天堂灰機改裝成桌面電腦,型喎!

401

世界首部遊戲機 Magnavox Odyssey
你以為世界首部遊戲機係雅達利?錯!圖中呢部喺1972年由Magnavox公司推出嘅主機Odyssey先係。

睇佢外形又大又笨,好難同遊戲機扯上關係。玩之前要先決定玩邊隻內置遊戲,再喺電視屏幕上面加塊透明膠板,成為唔同嘅遊戲版圖,玩家則主要控制正方形光點嚟進行遊戲。而家睇實在得啖笑,但當年諗到咁樣打機都非常黐線,可惜RESTART呢部只係display,好多配件都冇,暫時玩唔到。

Odyssey兩個手掣好大舊,亦好笨重,主要用佢控制所有操作。
實機冇得試,好在網上都搵到啲舊相,呢張應該係宣傳圖片,可以見到實際上係點玩嘅。
當年廣告亦有示範點將透明膠板放喺電視螢幕上,更寫明18至25吋電視都玩得。
呢個就係遊戲畫面,諗真其實得啖笑,實際上只有幾粒光點係由Odyssey控制,其餘全部都係透明膠板嘅效果。

那些年的古怪主機
講遊戲機歷史,如果每部主機都要講,睇怕可以分成3集慢慢講,RESTART內有唔少主機display,雖然唔係部部玩得,但唔少都的確屬於「鬼罕」級數,未必見過。紅白機、開發機等都顯得係基本嘢,以下4部連我都係第1次見實物,同大家分享下。

410
1984
Atari 2600 Jr.
首部遊戲機係Odyssey,唔可以話錯,但世界上首部真正意義上嘅遊戲主機,其實係1976年Atari(雅達利)公司推出嘅Atari 2600。佢係第1部冇內置遊戲、手掣同螢幕嘅主機,並將主機設計成可更換遊戲卡帶,只要有遊戲就可以一直維持壽命,直到而家所有遊戲機都係用呢個設計開發。而呢部Atari 2600 Jr.就係喺1984年推出嘅廉價版,唔止別具意義,市場上收藏嘅人亦較少。

411
1990
Bandai Playdia
呢部機已唔算罕,喺中古遊戲界算係大熱產品,1990年由Bandai推出,硬體強勁,定價高達24,800 yen,只喺日本發售。遊戲大部分都係日本動畫改編,全部由Bandai開發。另外,呢部機用紅外線手掣,當年嚟講,「無線手掣」呢件事算非常有遠見。值得一提嘅係其中1隻遊戲《龍珠Z》,被唔少fans視為頭號收藏遊戲,有機會我都想見識下。

412

1995
Apple PipPin
Apple都出過遊戲機?但嚴格嚟講,呢部PipPin唔係Apple生產,只係負責開發,再授權第三方廠商進行生產發行。1995年Bandai就幫Apple PipPin推出市場,然而當年PlayStation已經推出,加上任天堂N64亦係市場大熱,加上定價US$599貴得驚人,部機亦只有Bandai開發遊戲,全部問題加埋一齊,結果只賣出幾千部就玩完,亦被外國媒體形容為「史上25件科技垃圾產品」之一。

413
1995
Casio Loopy
同樣係1995年,Casio都出過1部非常古怪嘅遊戲機,完全針對女性市場,最特別係喺主機度內置彩色printer,可以將遊戲畫面打印成貼紙。你問我呢個功能有乜咁勁,真係唔識答你,但如果俾我諗,我會加個有美顏功能嘅自拍鏡頭喺部機度,最少唔會出得10隻games就玩完。

《Pixels》玩8-bit格仔
即將喺7月上映嘅電影《Pixels》,講述外星人突然襲擊地球,但外星人竟然似足7、80年代嘅8-bit經典遊戲,包括太空侵略者(Space Invaders)、食鬼(Pac-Man)、Centipede等等,被佢哋攻擊就會即變pixels,勁癲!戲未上都知要睇,你又知唔知套戲出現過咩經典遊戲?以下4款必定要識。

首隻街機射擊遊戲《Space Invaders》
由Taito公司喺1978年推出,射擊遊戲類,同時亦可以話係電子遊戲始祖之一。當年市場多數以迴避、碰撞等作為主要玩法,而且傾向玩家之間對戰,但此作嘅製作人西角友宏就喺遊戲加入AI同射擊操作,唔止敵人會攻擊你,你亦要攻擊敵人,推出後即獲得巨大回響。想當年,我哋俗稱隻game叫「打怪獸」,正式官方名稱叫「太空侵略者」,回憶係咪即刻返晒嚟?

11111

遊戲入面嘅「怪獸」似乎好難搞,望番隻game嘅「怪獸」反而覺可愛。
遊戲入面嘅「怪獸」似乎好難搞,望番隻game嘅「怪獸」反而覺可愛。

打開女性市場《Pac-Man》
Namco公司喺1980年推出,點玩應該唔使多講,此作開發原因係「食鬼之父」岩谷徹發現當年市場上只有暴力遊戲,冇老少咸宜、女性都鍾意嘅作品,故此特別針對女性市場開發。遊戲睇落簡單,但當中有複雜嘅AI運算,4隻鬼Blinky、Pinky、Inky、Clyde唔止分顏色,其實亦有自己一套嘅行動習慣,識一波波咁攻擊食鬼。另外,岩谷徹都會客串《Pixels》同食鬼交鋒,好期待。

503

Pac-Man變大後好鬼可愛,不過同樣破壞力驚人,分分鐘係最後大佬。
Pac-Man變大後好鬼可愛,不過同樣破壞力驚人,分分鐘係最後大佬。

回到大叔未紅時《Donkey Kong》
由任天堂喺1981年推出,遊戲簡單,頂樓大猩猩會不斷扔木桶攻擊玩家,玩家要操作角色避開或跳過障礙,最終去到頂樓救出女孩子。當年任天堂已捉到玩家口味,喺街機初崛起嘅黃金時代,呢隻game成為最普及嘅作品之一,7、80後好難冇玩過。值得一提嘅係,玩家操作嘅角色Jumpman,亦係往後遊戲界明星Mario,相信冇人會估到Jumpman嘅潛力,最終Mario更成為人人都識嘅「大叔」。

505

而家睇番《Donkey Kong》已經見到任天堂造遊戲嘅功力,簡單、易玩但難度十足,當年冇乜細路真係可以跳到上去救人。

致敬變名作《Arkanoid》
同樣係由Taito公司開發,1986年推出,亦係經典名作之一,唔講唔知,其實隻game都係用科幻太空做背景,玩家控制長形太空船,將彈珠來回敲打,只要將關卡入面嘅磚塊撞晒就可過關,因此當年又叫「撞磚」。不過,其實撞磚並非原創,早喺1976年Atari已經參考《Ping Pong》設計出1款叫《Breakout》嘅遊戲,佢同撞磚玩法一樣,只係冇複雜版圖設計同道具系統,但Taito能造到兩隻經典名作,已唔簡單。

507

而家睇番,當年畫面同玩法都唔算失禮,經典作品經得起時間考驗。
關鍵詞
gameRESTART

YOU MAY ALSO LIKE ...