女生瘦得有型3部曲by Hidy Bobo

Blogger

廣告

(專欄新血)【”Sweat in Style” by Hidy Bobo】

為咗靚,你可以去到幾盡?大部分女性每日上班8小時,身邊有朋友放工就要返屋企煮飯、照顧小朋友,日日咁坐法又冇時間keep fit,想唔肥都幾難!眼見脂肪積聚於腹部、臀部、大腿,慢慢變成「啤梨」身形,慘不忍睹。好多OL寧願餓住肚食少啲,將甜品拒而遠之,證明女人為咗靚,真係可以去到好盡!但唔食嘢真係work?真係可以避免身材走樣?睇睇以下3部曲,可能會解答到你。

1. 瘦得健康才是王道
窈窕淑女,君子好逑,女士們想擁有美好身段,增加吸引力,絕對可以理解。曾經有姊妹同我講,只要唔食晚餐、早啲瞓,脂肪同體重自然會減少,其實大錯特錯。要瘦就要瘦得有「型」,何必虧待自己,想食又唔敢食,瘦到得棚骨,又點會獲得男性青睞?瘦得健康才是王道。

首先,要塑造完美身段必先擁有1個健康嘅身體,坊間流傳嘅「輕斷食」減肥法係指1星期內其中5日正常飲食、任選2日斷食,其間只食蛋白質、低糖及蔬果類,只限攝取500卡路里,聽落幾健康、幾make sense,但並非人人適用。其實減少脂肪同時亦少咗肌肉,意味着少咗幫你消耗熱量嘅「利器」,人反而更容易再肥番。長此下去,更有可能引致體力透支、營養不足、月經不規律等問題。而且長期斷食會令身體產生毒素,容易有口氣,最終你嘅追求者會一一被嚇走,幾瘦都冇用啦!

2. 又食又瞓
咁到底點先可以得到近來女生瘋狂追求嘅馬甲線?單靠踩機同狂做捲腹係唔夠㗎。強化腹部肌肉同保持適量嘅身體脂肪,配合均衡飲食、規律嘅生活作息時間,加上定期進行肌力訓練同無氧運動,再透過有氧運動例如跑步、游泳,強壯腹肌從而減去體內脂肪。到時候,馬甲線、人魚線同曲線統統呈現出來,「食得又瞓得」,只要你有決心同恆心,呢種冇顧慮嘅瘦身方法何樂而不為呢?

3. 釋放天然美
運動嘅好處其實係與日俱增,只要keep住每日做帶氧運動如踩單車、游水或跑步,每次最少30分鐘並維持喺中低強度,令心跳保持喺最高心跳率嘅60-70%,咁身體嘅操作就唔單只以有氧系統為主,久而久之,心肺功能亦會大大提升,自然紅粉菲菲精神奕奕,充滿自信散發魅力!

從今以後,唔使再憂慮食多少少都會肥,運動係最佳嘅減肥方法,燃燒多餘脂肪,保持至fit狀態,等你保持正能量、愉悅嘅好心情,打造煥然一新嘅自己!


Hidy Bobo – 跑手/電台節目主持/Blogger

天生坐唔定,愛運動,尤其跑步,堅毅不屈的態度從這裏開始。跑步時候的我是最自由、隨性,一切回到原點,感覺自己確實地存在,用力地呼吸,盡情揮動汗水,從雜念生信念,憑着意念讓自己走得更遠。

2005–2006 Pacers Athletics Club
2008–2009 Watsons Athletics Club
2008–2009 City University Sports Team Committee
2009–2011 Glenhuntly Athletics in Australia

2013–2014 New Balance Excellent Ambassador

facebook: Hidy Bobo | IG: hidybobo