黑膠時代 聽歌要膠

黑膠，作為最早期1種記錄聲音嘅媒介，有種獨特嘅江湖地位，先後經歷多種新媒介衝擊都仍然不死，近年甚至誇張到有捲土重來嘅趨勢，完
全無視數碼化音樂變成主流。光計2014年，黑膠市場竟然上升咗超過50%，美國本土售出超過920萬張黑膠碟，聲勢驚人，特別係生於1個愈
來愈冇需要買唱片嘅時代，而熱潮喺香港亦愈吹愈旺。玩黑膠再唔係1個假日去鴨記尋寶嘅文青運動，係實實在在嘅音樂態度。
好似最近日本audio-technica推出1部專業級黑膠唱盤AT-LP120-USB，有齊專業級唱盤設定之外，同時加入新時代嘅USB輸出，俾你直駁電腦播

歌，pro得嚟門檻唔高，正係好時機宣布黑膠時代回歸，你今日膠咗未？

text-Nam photo-King Ho、Hin、Pakco、網上圖片

spec.
售價：$3,938
查詢：audio-technica（2356 9268）

One Direction都玩CROSLEY特別版膠盤
主要玩型格款嘅CROSLEY黑膠唱盤，近期同早排嚟完香港嘅One Direction合作出特別版，規格同原版冇乜分別，但就喺機箱面印上「One
Direction」字樣，亦有仿手繪十字pattern作點綴，款式又夠型。雖規格未算最專業，但黑膠初哥同粉絲已經好夠玩。

專業唱盤 乜都有得玩
黑膠盤近年愈出愈多，但專業級嘅其實算少數，始終大家只係當佢潮物類，玩款式玩品味，直接擺碟、放針，但求有聲就算，較少見好似
AT-LP120-USB咁足料嘅黑膠盤。
基本1部黑膠盤可分成唱盤、唱臂同唱頭3部分，先講唱盤，用上直驅式高扭力摩打，可穩定地做到33、45同78轉速（rpm），亦因此可做到倒
播操作，甚至微調+/-10%或+/-20%嘅轉速；唱臂方面，亦有多種機械式結構，可調節唱臂壓力、高度、防滑等等，更有專用液壓式唱臂升降桿，連升降都可做到非常精準，減低唱頭會因受壓過量而快速損耗嘅問題；最後係唱頭，為針對高要求嘅用家，AT-LP120-USB容許自行更換唱頭，就算你黑膠上癮，玩到要換頭咁高level，佢亦一樣滿足到你。

唱頭貴過部機 雙動圈AT33Sa
當你開始明白黑膠盤唔係就咁放隻碟上去嗰陣，先會發現黑膠盤就好似耳機一樣，又係另1個深淵。由於audio-technica黑膠盤都可以換唱頭
，所以亦有推出相關產品，其中最高階型號AT33Sa，有一體成形嘅錐狀針桿，配上超微線型唱針同雙動圈設計，再以釹鐵硼磁鐵同鐵鈷合金
磁軛打造，身價高達$8,215。對高階玩家嚟講，可能夢寐以求，但肯定唔係入門產品，當見識下吧啦！

鬧市搵膠 HMVideal最舒服
專業嘅黑膠盤原來可以咁刁鑽，就算你覺得自己冇必要玩到咁勁都好，識咗起碼知點揀。講到底，好多人玩黑膠都係純粹貪型，不過每個人
都有成長階段，想型先玩，絕對唔等於膚淺。有機當然要有碟，咪以為黑膠難搵，實情唔少大型唱片鋪都有得賣，推薦中環娛樂行HMVideal
，正在劃開1個黑膠碟區，新、舊碟都有，肯搵實搵到好嘢，重點係唔似深水埗咁立立亂，買咗唔怕隻碟有花或聽唔到。同其他HMV比，呢間
鋪亦特別大，人唔多，行都行得舒適啲，加上有埋試聽區（不過冇得揀碟聽），唔買去睇下都開心。

黑膠唔等於LP？SP、EP又點解？
技術性咁講，黑膠唔完全等於LP。LP係1948年先有嘅事物，但黑膠唱片呢樣嘢早喺1887年已經由德國人Emile Berliner發明，正確名稱係Vinyl，當時佢係設計嚟俾留聲機錄音用，因係扁身圓盤，所以稱「唱片」。至於LP（Long Playing），係美國Columbia Records喺1948年制定，33rpm、12吋，因單面能錄音近30分鐘而得名，另外亦有78rpm、10吋嘅SP（Standard Playing），但不算普及。至於45rpm、7吋嘅EP（Extended Play），雖錄音時間較短，尺寸非常便攜，亦係經典。近年已好少公司會出EP，SP更加罕見，亦令黑膠同LP關係愈來愈親密。

黑膠推薦
影相嗰日係咁意搵下就有幾隻筍嘢，以下幾隻有買貴冇買錯，玩膠要有。

黑膠點生產？行內人話你知
本地唱片公司IMAGINE IMAGINE IMAGINE RECORDS主理人Yuman，有聽開本地indie bands一定識佢，旗下樂隊包括A New World If You Can Take It（ANWIYCTI）、Teenagarten、Fantastic Day、The Yours等等。喺Yuman個人喜好推動下，由2012年公司成立開始，CD之外，佢都着手幫旗下樂隊出埋黑膠碟，由設計、印碟、後期測試等部分都有參與。想知今時今日唱片公司點印黑膠碟，同CD又有咩分別？聽佢講！

N：《新Monday》
Y：Yuman

N：點解當初會想幫啲bands做埋黑膠碟呢？
Y：對我嚟講，黑膠係音樂最原本嘅嘢，佢嘅存在感比其他媒介都高好多，而且黑膠可以擺好耐，收藏價值亦較高，更有種裝飾嘅感覺，就咁擺出嚟都好睇。

N：咁喺香港印黑膠難唔難？過程係點？
Y：難就唔難，不過好花時間囉。首先同印CD一樣，你首先要有個音樂file寄俾廠，之後佢哋就要做鐵模，點解叫「壓碟」呢？係因為黑膠真係壓出嚟嘅，上下兩個模，壓落中間舊膠度，你想像下好似泥膠咁，一壓就會變成圓碟形，呢隻碟就會係所謂測試碟。印廠會將試聽寄返嚟俾我哋聽1次，睇下音色啱唔啱、有咩改，冇問題就可以印喇。

N：聽落真係幾花時間！
Y：最主要係試聲嗰part麻煩，因為黑膠同CD係兩種唔同嘅媒介，質料本身好大分別，所以要特別為黑膠造個mastering，而呢個mastering一定要有隻碟喺手先聽到。而香港本身冇廠印黑膠，一定要去美國、英國、日本等外國地方，所以每次來來回回，最快都要10個禮拜左右先搞得掂1張黑膠碟，然後攞去大量印。因此成本又高，時間又長，而且美國、日本等地方嘅黑膠風氣好旺，美國啲廠誇張到排隊要排半年，太多人要印碟，佢哋已經做唔切。

N：有冇留意近年CD少人買咗，但黑膠返晒嚟？
Y：以我公司為例啦，暫時都係CD多人買。我覺得好似西裝同tee咁，兩樣嘢唔同，冇抵觸，可以繼續共存。不過，近2、3年係多咗唔少人玩，香港亦有唔少地方有擺黑膠碟上架，例如HMV、Hong Kong RECORDS等，想買想賣，都已經比較簡單。甚至你留意下，有啲潮鋪都有黑膠賣嘅，畢竟佢係會比CD多咗1種音樂以外嘅裝飾感。

N：咁你玩黑膠咁耐，有冇咩保養心得？
Y：保養都唔係難，得閒攞出嚟抹下，聽多啲，聽完記得封番入袋唔好惹塵，反而最重要係環境唔好太濕，因為濕得滯可能會發霉，要keep住乾燥囉。

伸延閱讀

潛水硬漢 OLYMPUS STYLUS TG-4 TOUGH

情懷不老！經典遊戲角色人樣進化史

遊戲靚聲王 TURTLE BEACH ELITE 800